U mbajt takim konsultativ me palët e jashtme të interesit për zhvillimin dhe riakreditimin e programeve studimore në Fakultetin e Edukimit

Fakulteti i Edukimit në Universitetin Publik “Kadri Zeka” në Gjilan organizoi një takim konsultativ me palët e jashtme të interesit, në kuadër të procesit të zhvillimit dhe riakreditimit të programeve studimore.

Takimi kishte për qëllim forcimin e bashkëpunimit ndërmjet universitetit dhe institucioneve arsimore, me synim që programet studimore të jenë në përputhje me nevojat reale të sistemit arsimor, zhvillimet bashkëkohore në fushën e edukimit dhe kërkesat e tregut të punës.

Në hapje të takimit, pjesëmarrësit i përshëndeti Prorektorja për Zhvillim Akademik dhe Cilësi, Prof. Asoc. Dr. Voglushe Kurteshi, e cila falënderoi drejtorët e shkollave fillore, përfaqësuesit e institucioneve parashkollore, mësimdhënësit dhe edukatoret për pjesëmarrjen dhe kontributin e tyre në këtë proces të rëndësishëm. Ajo theksoi se bashkëpunimi i vazhdueshëm me institucionet arsimore është thelbësor për zhvillimin e programeve cilësore dhe për përgatitjen e kuadrove profesionale që u përgjigjen sfidave të arsimit.

Fjalën hyrëse e mbajti edhe U.D. Dekania e Fakultetit të Edukimit, Prof. Asoc. Nerxhivane Krasniqi, e cila theksoi rëndësinë e partneritetit ndërmjet fakultetit dhe shkollave, duke nënvizuar se bashkëpunimi me institucionet arsimore dhe parashkollore është i domosdoshëm për ngritjen e cilësisë së programeve studimore dhe për përgatitjen e mësimdhënësve të së ardhmes.

Gjatë takimit u zhvilluan diskutime mbi përshtatshmërinë e programeve studimore me nevojat e institucioneve arsimore dhe parashkollore, kompetencat profesionale që duhet të zotërojnë të diplomuarit, organizimin dhe cilësinë e praktikës profesionale, si dhe format e bashkëpunimit ndërmjet universitetit, shkollave dhe institucioneve parashkollore. Gjithashtu, u trajtuan nevojat për përditësimin e kurrikulave dhe zhvillimin e mëtejmë të programeve studimore, ndërsa palët e interesit dhanë rekomandime konkrete për përmirësimin e vazhdueshëm të cilësisë së tyre.

Në kuadër të takimit u prezantuan edhe programet studimore të Fakultetit të Edukimit, duke shpalosur strukturën, përmbajtjen dhe objektivat e secilit program, si dhe mundësitë për zhvillimin e tyre të mëtejshëm në përputhje me standardet e cilësisë.

Në takim morën pjesë përfaqësues të institucioneve arsimore dhe parashkollore, drejtorë shkollash, mësimdhënës, edukatore dhe partnerë të tjerë të Fakultetit të Edukimit, të cilët kontribuan me përvojën, sugjerimet dhe rekomandimet e tyre për zhvillimin e programeve studimore. /2LONLINE/