U mbajt diskutimi publik në fshatin Budrikë
(2L ONLINE) – Në fshatin Budrikë të Vitisë është mbajtur diskutimi publik për planifikimin e kornizës buxhetore 2015-2017. Në këtë takim para Budrikasëve kanë folur zv. Kryetari i Komunës së Vitisë, Hasan Aliu së bashku me drejtorin për Ekonomi, Financa dhe Zhvillim, Ibrahim Rama lidhur me buxhetin komunal konkretisht listën për investime kapitale të cilën e kanë paraparë Institucionet Komunale për vitet në vijim e sidomos për investimet të cilat parashihen të bëhen në fshatin Budrikë.
Aliu tha se Institucionet Komunale të Vitisë janë të përkushtuar që të investojnë në të gjitha lokalitetet e kësaj komune por potencoi se buxheti për investime kapitale është jo i mjaftueshëm karshi kërkesave dhe nevojave të qytetarëve. “ Kërkesat tuaja për investimet janë të arsyeshme dhe legjitime por duhet të jemi të sinqertë se buxheti për investime kapitale është jo i mjaftueshëm nëse e marrim parasysh se janë vetëm mbi 2 milion euro për të gjitha fshatrat e Komunës sonë” u shpreh Aliu.
Ai megjithatë tha se Qeveria Komunale e Vitisë do të punoj ngushtë me të gjithë me qëllim që të thithen sa më shumë donacione. Ndërkaq Drejtori për Ekonomi, Financa dhe Zhvillim, Ibrahim Rama potencoi se në buxhetin e sivjetmë që është paraparë nga udhëheqësi e kaluar nuk kishte paraparë asnjë investim për fshatin Budrikë duke potencuar se për vitet në vijim qeverisja e tanishme ka paraparë një varg investimesh.
“Në listën për investime kapitale të vitit 2014 nuk është paraparë që të ndodhë asnjë investim në fshatin Budrikë , por ne kemi paraparë që në vitet 2015-2017 të bëhen këto investime: Asfaltimi i rrugës nga vendi i quajtur Qeshmja deri të Ura e Remnikut, projekti i ujësjellësit, një pjesë të trotuarit si dhe ndriçimin publik” u shpreh Rama.
Ndonëse ky takim ishte paraparë të mbahet ditë me parë me kërkesë të banorëve të këtij lokaliteti ajo ishte shtyrë për ditën e djeshme. Gjatë këtij takimi është hapur edhe diskutimi publik ku banorët e Budrikës kanë parashtruar kërkesat dhe nevojat e tyre./2L ONLINE/