U diskutuan çështje me interes të përbashkët në fushën e sigurisë dhe menaxhimit të emergjencave

Drejtori i Drejtorisë për Mbrojtje dhe Shpëtim në Komunën e Gjilanit, Enver Shabani, është pritur në një takim nga Komandanti i Stacionit Policor në Gjilan, Besim Rexhepi, ku u diskutuan çështje me interes të përbashkët në fushën e sigurisë dhe menaxhimit të emergjencave.

Në këtë takim morën pjesë edhe Salih Mustafa, përgjegjës i operativës 112 në Gjilan, si dhe Hazir Mustafa, zyrtar për sistemimin e forcave për MSHN në kuadër të Drejtorisë për Mbrojtje dhe Shpëtim.

Gjatë takimit u theksua rëndësia e bashkëpunimit ndërinstitucional dhe koordinimit të vazhdueshëm, me qëllim të reagimit sa më të shpejtë dhe efikas në situata emergjente, si dhe rritjen e nivelit të sigurisë për qytetarët.

Drejtori Shabani tha se po ashtu, u diskutuan mundësitë për avancimin e kapaciteteve profesionale, përmirësimin e sistemeve të komunikimit dhe rritjen e efikasitetit në menaxhimin e emergjencave dhe se palët u dakorduan që bashkëpunimi të vazhdojë dhe të forcohet edhe më tej në të ardhmen.

“Ky takim dëshmon përkushtimin e institucioneve përkatëse për të qenë në shërbim të qytetarëve dhe për të garantuar siguri dhe reagim të koordinuar në çdo situatë”, ka thënë drejtori Enver Shabani.  /2LONLINE/