U diskutua për bashkëpunimin ndërinstitucional

Zëvendëskryesuesi i Këshillit Prokurorial të Kosovës (KPK), Prof. As. Dr. Dardan Vuniqi, priti sot në takim Dekanin e Fakultetit të Shkencave Sociale në Gjilan, Prof. Asoc. Dr. Selim Daku.

Me këtë rast, Prof. As. Dr. Vuniqi theksoi se takimi i sotëm me Prof. Asoc. Dr. Selim Daku është një mundësi e vlefshme për të shkëmbyer ide dhe për të diskutuar për bashkëpunimin ndërinstitucional, veçanërisht në çështjet që ndërlidhen me zhvillimin e kompetencave profesionale, praktikën profesionale, si dhe çështje të tjera me interes të përbashkët strategjik.

Ai vlerësoi rëndësinë e bashkëpunimit ndërmjet institucioneve të drejtësisë dhe institucioneve të arsimit të lartë, duke theksuar se përfshirja e studentëve në procese praktike dhe profesionale ndikon drejtpërdrejt në ngritjen e kapaciteteve të gjeneratave të reja dhe në avancimin e sistemit të drejtësisë në vend.

Gjithashtu, edhe Dekani i Fakultetit të Shkencave Sociale në Gjilan, Prof. Asoc. Dr. Selim Daku, shprehu gatishmërinë e tij dhe të institucionit që drejton për bashkëpunim, përfshirë organizimin e praktikave profesionale për studentët e programeve të drejtësisë dhe shkencave sociale, seminareve të përbashkëta dhe projekteve kërkimore-shkencore.

Prof. Asoc. Dr. Daku theksoi se bashkëpunimi me institucionet e sistemit prokurorial është me rëndësi të veçantë për përgatitjen akademike dhe profesionale të studentëve, duke shtuar se përvoja praktike dhe kontakti i drejtpërdrejtë me institucionet e drejtësisë kontribuojnë në zhvillimin e kuadrove profesionale dhe të përgjegjshme.

Bashkëbiseduesit theksuan se ky takim shënon një hap të rëndësishëm në mbështetjen e përgatitjes së profesionistëve të ardhshëm të drejtësisë, si dhe në forcimin e bashkëpunimit ndërinstitucional në funksion të avancimit të edukimit juridik dhe sundimit të ligjit në Republikën e Kosovës. /2LONLINE/