Thirrje për unitet dhe reflektim në LDK

NGA: Avdyl Jerliu

Deklarata e fundit e Prof. Avdullah Hotit ka nxitur një debat brenda dhe jashtë Lidhjes Demokratike të Kosovës. Është e natyrshme që pas çdo procesi zgjedhor të ketë analiza dhe diskutime mbi të ardhmen e partisë.

Megjithatë, në këtë moment delikat, më e rëndësishmja për LDK-në nuk është polarizimi apo përplasja e brendshme. Në këto momente më e rëndësishme është që të punohet për një unitet dhe reflektim të përbashkët mbi hapat që duhet të ndërmarrim për të forcuar vizionin tonë politik dhe për të rikthyer besimin e qytetarëve aty ku e meriton LDK-ja.

LDK-ja ka qenë gjithmonë një forcë politike e matur, shembull për të gjithë dhe e ndërtuar mbi parimet e demokracisë dhe dialogut. Për këtë arsye, të gjithë ne nga anëtarët e thjeshtë deri te drejtuesit e partisë, duhet të vendosim interesin e LDK-së dhe të Kosovës mbi çdo interes individual apo grupor.

Debati dhe kritika e shëndetshme janë pjesë e demokracisë së brendshme, por ato duhet të jenë konstruktive dhe të orientuara drejt gjetjes së zgjidhjeve më të mira, e jo thellimit të dallimeve.

Sot, qytetarët e Kosovës dhe përkrahësit e LDK-së presin nga ne të tregojmë lidership dhe maturi. Ata presin një LDK të fortë, të bashkuar dhe të gatshme për të ofruar alternativën më të mirë për të ardhmen e vendit.

Kjo nuk arrihet me përçarje, por me bashkëpunim dhe vizion të qartë për reformat e nevojshme kur dihet mirëfilli se gjithmonë pas çdo procesi zgjedhor ka vend dhe nevoj për identifikimin e gabimeve dhe korigjimin e tyre.

Prandaj, ftojmë të gjithë strukturat e LDK-së që të angazhohen në një dialog të hapur dhe të sinqertë në vazhdimësi për të ndërtuar një strukturë edhe më të fuqishme, të përgatitur për sfidat e ardhshme që na presin, siq janë zgjedhjet lokale.

Të lihen anash inatet për interesa të ngushta personale dhe grupore, mos të dëmtohet e as lëndohet LDK përsëri siq ka ndodhur jo pak herë në të kaluarën. Pas dy viteve është kalendari i rregullt i zgjedhjeve të brendshme në LDK, dhe ata që kanë ambicie për ta marr timonin e udhëheqjes së LDK-se, ti futen garës në mënyrë demokratike duke e shpalosur vizionin e tyre për LDK-në fituese në zgjedhjet e radhës.

Është obligim moral, njerëzor dhe human për të gjithë ata që e duan LDK-në të fortë, që të reflektojnë duke e shiquar veten në pasqyrë dhe duke ja bërë pyetjen vetes çka kam bërë për LDK-në.

Lidershipi i tanishëm i LDK-së duhet që të angazhohet fuqishëm duke i lënë anash inatet personale dhe të angazhohen për një qëllim të vetëm, unifikimin dhe bashkimin e të gjitha forcave që kanë vullnet dhe e duan LDK-në.

Le të tregojmë se LDK-ja e Presidentit Historik Dr. Ibrahim Rugova është dhe do të mbetet shtëpia më e ndershme politike, shtëpi e maturisë, demokracisë dhe unitetit në të gjitha trojet shqiptare! /2LONLINE/