Thaçi për xhihadistët: Do ta ndalim të keqen

Kryeministri i Kosovës, Hashim Thaçi, ka komentuar në lidhje me arrestimet e sotme të përkrahësve të ISIS-it dhe AL-Nusras në Kosovë. Nëpërmjet një postimi në Facebook, Thaçi deklaron se organet shtetërore të Kosovës po vijojnë me aksionin e gjerë kundër të dyshuarve për pjesëmarrje në luftërat e Sirisë dhe Irakut, dhe thekson se janë të vendosur që ta ndalin këtë të keqe.

“Siç kam paralajmëruar edhe javën e kaluar, organet shtetërore kanë filluar një aksion të gjerë kundër të dyshuarve për pjesëmarrje në luftërat e Sirisë dhe Irakut. 40 persona janë arrestuar nën dyshimin për pjesëmarrje në luftëra të huaja duke e rrezikuar sigurinë tonë kombëtare dhe rendin kushtetues. Ne jemi të vendosur që ta ndalim këtë të keqe dhe nuk do të ndalemi me kaq. E ritheksoj se Kosova nuk do të jetë tokë e plleshme për armiqtë e vlerave Euro-Atlantike të Kosovës, të drejtat e njeriut, liritë e plota fetare dhe sistemin kushtetues sekular”, shkruan Thaçi në Facebook.