Thaçi: Do të punojmë për përmirësimin e pozitës së romëve

Zëvendëskryeministri Hashim Thaçi tha të mërkurën se do të punojnë për përmirësimin e vazhdueshëm të pozitës së romëve, kushteve të jetesës dhe përfshirjes së tyre në institucione.

Lexoni postimin e Thaçit në Facebook.

“Sot është 8 prilli, Dita Ndërkombëtare e Romëve. Sot të gjithë festojmë së bashku me bashkëqytetarët tonë të dashur nga radhët e komunitetit rom, kremtojmë historinë, kulturën dhe traditat rome dhe ngrisim zërin për ndërgjegjësimin e të gjithë neve rreth sfidave me të cilat përballet ky komunitetit në gjithë botën. Sivjet përmbyllet “Dekada për Përfshirjen e Romëve”, por ne duhet të mbesim të përkushtuar që të hapim etapa të reja për përmirësimin e vazhdueshëm të pozitës së romëve, kushteve të jetesës dhe përfshirjes së tyre në shtetin tonë. Prania e romëve në shoqërinë kosovare është vlerë e shtuar për diversitetin e shoqërisë sonë dhe ftoj që të gjithë të punojmë edhe me më shumë përkushtim për t’i trajtuar të gjithë pjesëtarët e komunitetit rom me dhembshuri, tolerancë dhe respekt”.