Tërnava: FAK-u duhet që sovranitetin e saj legjitim ta shtrij në çdo cep të Kosovës

Njohësi i çështjeve të sigurisë Hajrullah Tërnava, thotë se nëse për çlirimin e Kosovës na kanë ndihmua miqtë tonë së bashku me aleancën e NATO-s, atëherë pyetja shtrohet se a do ta çlirojshim vetë ne Kosovën prej okupatorit serb me forcat tona, pa ndihmën e NATO-s?

Prej çlirimit të Kosovës e deri më tani kanë kalua 16 vite, por a e kemi shtri deri më tani sovranitetin tonë në tërë territorin e Kosovës e sidomos në veri të Mitrovicës?

Tërnava thekson se, nëse jo, atëherë a nuk u shkel kushtetuta e Kosovës deri më tani, apo tani e tutje po ndodhe kjo?!

“Nëse NATO-ja na ndihmoj në çlirimin e Kosovës, a nuk duhet ne të jemi mirënjohës dhe të këshillohemi me ta dhe nëse është e nevojshme edhe ti dëgjojmë për atë se çka na sugjerojnë?! Bisedimet mes Serbisë dhe Kosovës kanë për qëllim që të tejkalohen tensionet e luftës dhe të bëhet pajtimi mes dy shteteve e deri te njohja reciproke e këtyre dy shteteve. Nëse vjen deri te njohja mes veti të dy shteteve atëherë Kosova pa probleme do të anëtarësohet në OKB dhe do të jetë anëtare e plotë me të gjitha të drejtat e plota si të gjitha shtetet tjera”, thotë Tërnava për gazetën “Bota sot”.

Sipas tij, nëse do të themelohet FAK-u muajve në vijim, dhe vazhdon bashkëpunimi i ngushtë me NATO-n, pritet që së shpejti edhe FAK-u t’i bashkëngjitet aleancës së NATO-s dhe të jetë anëtare me të drejta të plota të kësaj aleance.

“Po u arrit kjo siç e shpjegova, bëhet pyetja se a do ta shtrij FAK-u sovranitetin e saj ne tërë territorin e Kosovës? Mendoj se këtu nuk ka nevojë për koment dhe FAK-u në çdo cep të territorit të saj do e shtrin sovranitetin legjitim të saj. Politika kosovare duhet të jetë e shkathet dhe kooperuese me aleatet e saj të luftës dhe të bëj analiza të thukëta rreth asaj se çka i propozohet në perspektivën e saj ushtarake dhe duhet ta din edhe njëherë se pa ndihmën e tyre ne nuk do të çliroheshim”, thekson ai.

Hajrullah Tërnava thotë se, prej çlirimit e deri më tani shndërrimi i FSK ne FAK është një proces i cili po vazhdon, dhe deri në shndërrimin në ushtri të rregullt do t’i ketë problemet e veta, por nëse ato udhëhiqen me mençuri dhe bashkëpunim me aleatët tonë në këtë rast me NATO-n, pa dyshim se ushtria jonë duhet të jetë në të ardhmen e gatshme dhe e përgatitur që ta ushtroj sovranitetin e saj në tërë territorin e Kosovës.