Të vendosur ta asfaltojnë rrugën Muhoc–Zarbicë

(2L ONLINE) – Në lagjen Zabeli i Sahit Agës, u mbajt takimi i banorëve të fshatrave të Malësisë së Bujanocit: Zarbicë, Priboc, Ramabuqë, Suharrën e Novosellë. Në takim morën pjesë një numër i konsiderueshëm i banorëve të ndjekur e të shpërngulur nga këto fshatra.

Po ashtu, takimin e nderuan dhe e përshëndetën Ministri i Shëndetësisë në Republikën e Kosovës Imet Rrahmani, Drejtori i Drejtoratit për Ndërtim i komunës së Bujanocit, Agim Haliti, drejtori i Departamentit për Shërbime Publike dhe Veprimtari Shoqërore, Bajramali Fejzullahu, drejtori i Shtëpisë së Shëndetit në Gjilan Fejzullah Fejzullahu, kryetari i Bashkësisë Lokale të Zarbicës, Selami Bajrami, biznesmen, profesor etj.

Agim Haliti pasi tregoi, përafërsisht sa do të kushtojë asfaltimi i rrugës, premtoi se komuna do ta kryejë obligimin e vet që i takon, vetëm le të grumbullohen 30 përqindëshi nga komuniteti. Qytetarët e shumtë gjatë debateve dhanë idetë e veta dhe të gjithë premtuan se do të ndihmojnë gjithsesi këtë projekt me shuma të caktuara të mjeteve financiare sipas mundësisë që kanë

Pas debateve të shumta e të hapura, unanimisht u vendos që asfaltimi i rrugës Muhoc – Zarbicë nuk duhet diskutuar më, por duhet të fillohet sa më parë.

Në vazhdim, nga propozimet e vetë të pranishmëve u formua Këshilli për asfaltimin e rrugës Muhoc-Zarbicë. Propozimet ishin gjithëpërfshirëse, përkatësisht nga secili fshat i Bashkësisë Lokale të Zarbicës. Po ashtu u propozua që Këshilli të ketë edhe anëtarët nga Diaspora. /2L ONLINE.