Të revoltuar për anulimin e njëanshëm të marrëveshjes

/2L ONLINE/ – Ahmet Daku, drejtues i OVL–UÇK-së, Dega në Gjilan ndihet i revoltuar, siç thotë ai, me anulimin e njëanshëm të marrëveshjes së bashkëpunimit mes Universitetit “Kadri Zeka” dhe OVL së UÇK dhe SHFD së UÇK, bërë vitin e kaluar.

Rikujtojmë se Universiteti “Kadri Zeka” dhe Organizata e Veteranëve të Luftës së UÇK – së, Shoqata e Familjeve të Dëshmorëve të UÇK-së, dega në Gjilan, kishin nënshkruar marrëveshje bashkëpunimi. Me këtë marrëveshje palët kishin për qëllim të sigurojnë mbështetjen e qëndrueshme dhe krijimin e lehtësirave për studime për familjet e dëshmorëve, invalidët e luftës, veteranët e luftës dhe fëmijët e invalidëve dhe veteranëve të luftës.

Marrëveshje bashkëpunimi me organizatat e dala nga lufta është kufizuar vetëm në qëllimin për krijimin e lehtësirave për studime për familjarët e ngushtë të këtyre kategorive.

Por, siç ka bërë të ditur Daku i OVL-UÇK–së, ai është njoftuar nga rektori aktual në Universitetin “Kadri Zeka” në Gjilan për anulimin e marrëveshjes.

Daku thotë se po shihet se rektori i ri që vjen nga fshati Bresalc – komuna e Gjilanit, nuk paska pas mundësi ta respektojë marrëveshjen që e ka bërë rektori para tij. “Te ne shqiptarët, po të vijmë në poste apo pushtete, mendojmë që çdo të mirë apo të keqe që e kanë bërë më parë duhet ta hedhim poshtë”, shprehet i revoltuar Daku.

Ai ka thënë se shoqatat e dala nga lufta e UÇK – së, Dega në Gjilan kishin bërë një marrëveshje me këtë Universitet që e mban emrin e heroit të Kombit Kadri Zeka që edhe ata e kanë bartur këtë emër gjatë luftës dhe në shenjë respekti për këtë marrëveshje edhe ia patën dhënë dhuratë flamurin e luftës këtij Universitetin por tani rektori i ri hodhi poshtë çdo gjë pa paralajmërim.

“Ne në këtë afat kemi pasur gjithsej pesë kandidatë, dy fëmijë të Dëshmorit dhe tre fëmijë te veteraneve. I qoftë për nderë këtij rektori dhe e lus Zotin që të ketë suksese kështu në fëmijë të Dëshmorëve dhe të bashkëluftëtarëve. Unë po të isha në pozitën e tij do të isha i turpëruar për gjestin apo veprimin e njëanshëm që e ka bërë”, është shprehur me ironi Ahmet Daku, kreu i OVL–UÇK-së, Dega në Gjilan. /2L ONLINE/