Të mos keqpërdoret uji i pijes

/2L ONLINE/ – Në mbledhjen e sotme të Bordit të Drejtorëve të Komunës së Kamenicës u diskutuan shumë çështje, por me rëndësi ishin mungesa e ujit të pijshëm, zgjatja e orarit të punës në Administratën e përgjithshme.

Kryetari i Komunës së Kamenicës Begzad Sinani kërkoi që të bëhet ndërhyja e menjëhershme për përmirësimin e gjendjes me ujë të pijshëm, që qytetarët e Kamenicës të kenë më shumë ujë. Po ashtu, Sinani ka kërkuar që uji të shfrytëzohet racionalisht dhe të mos keqpërdorët, pasi që mungesa e ujit të pijshëm është evident.

Ndërsa, në këtë takim u tha edhe se me zgjatjen e orarit të punës në administratën e përgjithshme qytetarët e komunës së Kamenicas kanë tri orë më shumë në dispozicion për kryerjen e shërbimeve në sektorin e gjendjes civile.

Përndryshe, në Komunën e Kamenicës, në disa pjesë janë duke u aplikuar reduktimet në furnizimin e qytetarëve me ujë të pijes. Kjo kishte nxitur edhe reagimin e LDK-së opozitare, sipas të cilës jeta në qytetin e Kamenicës është bërë thuajse e padurueshme në këtë kohë vape, pasi në katër lagjet e qytetit reduktimet e mëdha të ujit po e pamundësojnë një jetë normale për banorët e qytetit. LDK kishte fajësuar qeverisjen në Kamenicë si të papërgjegjshme ndaj qytetarëve! /2L ONLINE/