Me rastin e Ditës Ndërkombëtare të të Drejtave të Njeriut, të martën më 10 dhjetor, ora 20:00, do të jepet premiera e shfaqjes “Ofshamë”, e realizuar në kuadër të projektit “Ballafaqimi me të kaluarën në Kosovë” nga OJQ Aksioni kundër dhunës dhe Ndërtimi i Paqes (ANP), në bashkëpunim me Teatrin e Qytetit të Gjilanit, transmeton Portali 2LONLINE.
Shfaqja është një zë, një thirrje a një reflektim i shoqërisë tonë mbi rrugën, vështirësitë dhe gjendjen e të mbijetuarave të dhunës seksuale gjatë luftës së fundit në Kosovë dhe fatin e njerëzve të pagjetur. Një ëndërr e tyre. Një ankth bashkë me një ofshamë në fund. Një dashuri e humbur. Një e vërtetë dhe një dhimbje e madhe.
Premiera e shfaqjes “Ofshamë” me koncept dhe regji nga Burim Baftiu dhe Erson Zymberi do të shfaqet më 10 dhjetor 2019 në Teatrin e qytetit të Gjilanit duke filluar në ora 20:00.
Ky projekt është duke u implementuar në partneritet me KURVE Wustrow nga Gjermania dhe përkrahet financiarisht nga Ministria Federale e Gjermanisë për Bashkëpunim Ekonomik dhe Zhvillim (BMZ), transmeton 2LONLINE.com.
KOMENTE