Tash e nëntë vite Kushtrim Kadriut vazhdohet t’i ndalohet hyrja në Luginë

Tash e nëntë vite, Serbia vazhdon t’ia ndalojë hyrjen në Luginën e Preshevës, thotë Kushtrim Kadriu, duke e privuar atë nga e drejta për ta vizituar vendlindjen e të parëve të tij, pronat familjare dhe varret e familjarëve.

Në maj të vitit 2017, Kadriu bënë të ditur se ishte njoftuar nga autoritetet serbe se nuk mund ta kalojë më kufirin për në Kosovën Lindore, duke u ftuar për intervistim me akuza politike. Që nga ajo kohë, ai mbetet i ndaluar të hyjë në vendin prej nga rrjedh familja e tij, një veprim që sipas tij ka prapavijë politike dhe lidhet me aktivitetin e tij kombëtar dhe publik.

Kushtrim Kadriu, që aktualisht drejton Lëvizjen Qytetare “Vatra”, njëherësh është anëtar i Kuvendit Komunal të Gjilanit. ka vazhduar traditën atdhetare të familjes së tij, duke ngritur vazhdimisht zërin për të drejtat e shqiptarëve në Luginën e Preshevës dhe për të demaskuar politikat diskriminuese të Serbisë ndaj shqiptarëve në Kosovën Lindore. Përmes angazhimeve të tij publike, deklarimeve dhe aktiviteteve kombëtare, ai ka qenë kritik i vazhdueshëm ndaj trajtimit që u bëhet shqiptarëve në Preshevë, Bujanoc dhe Medvegjë.

Në një prononcim për 2LONLINE, Kadriu shprehet se, ndonëse ka lindur dhe jeton në Kosovë, ai është rritur me rrëfimet e familjes për vendlindjen dhe sakrificat e të parëve të tij (Ramabuçë, Komuna e Bujanocit). Ai thotë se lidhja shpirtërore me trojet familjare nuk është shkëputur asnjëherë dhe se mungesa e mundësisë për t’i vizituar ato mbetet një dhimbje e madhe.

“Askush nuk duhet të pengohet ta vizitojë tokën e vet dhe kujtimet familjare”, është shprehur Kadriu.

Kujtojmë se Kushtrim Kadriu është djali i Njazi Kadriu, kryetarit të parë të të burgosurve politikë në Gjilan, i cili ishte dënuar dhe përndjekur për shumë vite nga regjimi serb për aktivitetin e tij kombëtar dhe politik. Familja Kadriu njihet për kontributin e saj në çështjen kombëtare dhe rezistencën ndaj regjimit serb ndër vite.

Ndalimi i hyrjes së Kushtrim Kadriut në Luginën e Preshevës vazhdon të mbetet një nga rastet që ngre shqetësime për trajtimin e shqiptarëve dhe kufizimin e lirive themelore nga autoritetet serbe ndaj individëve me angazhim kombëtar dhe politik.  /2LONLINE/