Takojnë Jan-Peter Olters, bisedojnë rreth projekteve në fushën e arsimit parauniversitar

(2L ONLINE) – Përfaqësuesit e Lëvizjes Vetëvendosje pritën sot në takim një delegacion të Bankës Botërore të përfaqësuar nga z. Jan-Peter Olters, menaxher i Bankës Botërore në Kosovë dhe znj. Flora Kelmendi, zyrtare e lartë e operacioneve në këtë Bankë.

Në takim u diskutua për projektet perspektive të Bankës Botërore për fushën e arsimit parauniversitar në Kosovë, të cilat kanë për qëllim përmirësimin e cilësisë në këtë nivel të arsimit në Kosovë dhe të cilat Banka Botërore është e interesuar që t’i përkrahë.

Përfaqësuesit e Lëvizjes Vetëvendosje shprehën interesimin e tyre për të gjitha projektet e Bankës Botërore që lidhen me fuqizimin e llogaridhënies së institucioneve përgjegjëse për arsimin në Kosovë, rritjen e kapaciteteve menaxhuese të institucioneve arsimore prej nivelit qendror e deri në nivel shkolle, sigurimin e rezultateve objektive me rastin e vlerësimit në testet shtetërore, planifikimin e bazuar në të dhëna, etj.

Delegacioni i Bankës Botërore u prit në takim nga kryetari i Lëvizjes Vetëvendosje, Albin Kurti, deputeti Visar Ymeri dhe Jusuf Thaçi ekspert nga Komiteti për arsim. /2L ONLINE/