Takim pune ndërmjet ARRU-së dhe KRU “Hidromorava”

Në ambientet e KRU “Hidromorava” u mbajt një takim pune me përfaqësues të Autoritetit Rregullator për Shërbimet e Ujit (ARRU), me qëllim të monitorimit dhe verifikimit të procesit të nënshkrimit të kontratave ndërmjet ofruesit të shërbimeve dhe konsumatorëve.

Në takim morën pjesë z. Behxhet Bala, Drejtor i Departamentit të Ligjit dhe Licencimit, dhe znj. Mejreme Qerimi, Analiste e Shërbimit për Konsumatorë nga ARRU, ndërsa nga KRU “Hidromorava”, Gjilan, ishin të pranishëm znj. Ajsune Abdullahu, Sekretare e Kompanisë, z. Granit Sylejmani, Menaxher i Divizionit për Shërbime me Konsumatorë, dhe z. Valon Maliqi, Menaxher i Divizionit Komercial.

Gjatë takimit u theksua rëndësia e respektimit të nenit 24, paragrafi 1 të Ligjit Nr. 05/L-042 “Për Rregullimin e Shërbimeve të Ujit”, sipas të cilit secili ofrues i shërbimeve është i obliguar të lidhë kontratë me çdo konsumator, duke përcaktuar kushtet e përgjithshme të ofrimit të shërbimeve.

Po ashtu, palët diskutuan për trajtimin dhe vendimmarrjen lidhur me ankesat e konsumatorëve, duke theksuar nevojën për zbatim të vendimeve të Komisionit për Zgjidhjen e Ankesave të Konsumatorëve të ARRU-së brenda afateve të përcaktuara ligjore.

Ky takim u vlerësua si një mundësi e mirë për të forcuar bashkëpunimin ndërmjet ARRU-së dhe KRU “Hidromorava”, në funksion të përmirësimit të transparencës dhe cilësisë së shërbimeve ndaj konsumatorëve. /2LONLINE/