Takim bashkëpunimi ndëruniversitar për avancimin e mësimdhënies së gjuhës angleze

Prof. Asoc. Dr. Teuta Agaj Avdiu zhvilloi një takim të frytshëm me Shefen e Departamentit të Gjuhëve të Huaja në Universitetin “Aleksandër Moisiu” në Durrës, Prof. Asoc. Dr. Anita Muho, ku u diskutuan mundësi konkrete bashkëpunimi në fushën e mësimdhënies së gjuhës angleze.

Në cilësinë e bartëses së programit Master në Mësimdhënie të Gjuhës Angleze, Prof. Asoc. Dr. Teuta Agaj Avdiu shprehu mirënjohjen e saj për mikpritjen e ngrohtë dhe për gatishmërinë ndaj ideve të reja që synojnë zhvillimin profesional dhe akademik të studentëve dhe stafit akademik.

Gjatë takimit, është diskutuar për zgjerimin e bashkëpunimit ndërinstitucional përmes aktiviteteve të përbashkëta akademike, shkëmbimit të përvojave dhe krijimit të mundësive të reja për studentët dhe stafin e të dy universiteteve.

Në kuadër të këtij bashkëpunimi, u theksua se hapi i parë konkret do të jetë organizimi i një konference ndërkombëtare në Durrës, e cila do të mbledhë stafin akademik dhe studentët e programeve të gjuhës angleze nga Universiteti Publik “Kadri Zeka”, Universiteti “Aleksandër Moisiu” në Durrës, si dhe Constantine the Philosopher University në Nitra, Sllovaki.

Konferenca, e planifikuar të mbahet në muajin shkurt të vitit 2027, synon të shërbejë si platformë për shkëmbimin e ideve, përvojave dhe praktikave më të mira në mësimdhënien e gjuhës angleze, duke forcuar bashkëpunimin ndërkombëtar dhe zhvillimin akademik në këtë fushë.  /2LONLINE/