Tahiri: Serbia nuk dëshiron të jetë fqinj i mirë

Zëvendëskryeministrja e Kosovës, Edita Tahiri, ka vlerësuar se Serbisë i mungon vullneti politik për fqinjësi të mirë me Kosovën.

Qeveria e Kosovës ia ka paraqitur BE-së raportin për rrjedhojat e dialogut të Brukselit dhe procesin e zbatimit të marrëveshjes për periudhën janar- shtator 2014.
Zëvendëskryeministrja e Kosovës, Edita Tahiri, ka vlerësuar se Serbisë i mungon vullneti politik për fqinjësi të mirë me Kosovën, transmeton Epoka e Re.

Ajo ka deklaruar se shteti serb këtë mungesë vullneti vazhdimisht po e tregon gjatë procesit të zbatimit të marrëveshjes së Brukselit.

Thotë se tendencat për ta vonuar zbatimin e këtyre marrëveshjeve tregojnë se Serbia ende nuk i ka ndalur synimet për ndërhyrje në punët e brendshme të Kosovës.

Ajo mohon se Kosova ka bërë lëshime të reja në fushën e drejtësisë, duke thënë se Gjykata Themelore e Mitrovicës nuk do të shërbejë vetëm për komunat me shumicë serbe.