Ta ruajmë frymën rugoviane si vlerë kombëtare dhe demokratike
Shkruan: Arbër R. Ismajli
/2L ONLINE/ – Sot, njëzet e gjashtë vite më parë u themelua Lidhja Demokratike e Kosovës. Atëherë unë isha krejt i ri. E kuptova vetëm që ishte diçka shumë e rëndësishme. Burra e gra të rinj e të reja, mblidheshin bashkë dhe flitej gjatë për shpresën dhe mundësinë e realizimit të ëndrrës; një jetë në liri, ti jepej fund robërisë.
Shtresa më e ndritur e kombit kishin vendosur, për ti dhënë fund robërisë, shtypjes dhe pushtimin serb. Kishin vendosur të afirmojnë idenë e pavarësisë. Njëzëri ishte propozuar Dr. Ibrahim Rugova, të udhëhiqte këtë ëndërr e këtë parti. Njeri i mençur i urtë dhe i vendosur në qëndrime. Ky do bëhej atëherë dhe do mbetej deri në fund të jetës së tij kryetar i LDK-së. Që nga ajo ditë për Kosovën, filluan ndryshimet substanciale.
Filloj vetëdijesimi se Kosova duhet të jetë e pavarur. Edhe pse skeptikët nga radha e atyre që ishin pajtuar me bashkim-vëllazërimin, e shihnin si iluzive edhe vet idenë e tillë.
Integrimin në mekanizmat ndërkombëtar, Kosova e mbikëqyrur ndërkombëtarisht, konsiderohej iluzion. Por, elita kombëtare në krye me kryetarin Rugova do të arrij shumë shpejtë të afirmoi programin nacional, liri, demokraci dhe pavarësi. Pavarësinë që tani po e gëzojmë me të gjitha vështirësitë që ka Kosova aktualisht!
Afirmimi i Kosovës në botë përmes LDK-së dhe liderit nacional, kishte një frymë krejt tjetër nga ajo që tani po e shohim. Një gjeneratë e tërë kontribuoi për të krijuar një vetëdijesim tjetër.
E gjitha tashmë na del si imperiativ i kohës për tu angazhuar me korrektësi dhe dashuri ndaj vlerave kombëtare në mënyrë që ti rikthehet dinjiteti LDK-së. Të mbahet e gjallë, filozofia e saj e bazuar në besimin dhe mirëkuptimin mes veti.
Duke ju dhënë përparësi atyre që dinë, munden dhe kanë guximin qytetar për reforma partiake e shtetërore. Atyre që deri dje ishin shtylla e kombit dhe e vet LDK-së dhe atyre që u rritën dhe u zhvilluan me filozofin rugoviane!
Atyre të cilët i shtruan rrugën pavarësisë së vendit, krijuan vlerat e mirëfillta demokratike dhe e bën Kosovën të njohur ndërkombëtarisht si një komb paqedashës dhe i mençur.
Paradoksale është se njerëzit e tillë eliminohen politikisht për tu zëvendësuar me antivlera. Uroi të këndellemi të avancojmë vlerat dhe programet për reforma, duke ruajtur frymën rugoviane si vlerë kombëtare dhe demokratike.
LDK-ja, e 23 Dhjetorit 1989, ishte dhe mbetet bazamenti i filozofisë së lirisë dhe pavarësisë së Kosovës. Kosovës demokratike, të integruar në UE dhe mekanizmat ndërkombëtar, me miqësinë e përhershme të SHBA.
Duke ruajtur vlerat kombëtare, duke u motivuar për punë, për një jetë më të mirë dhe duke i hapur rrugët për një lëvizje të lirë në Evropë, atje ku edhe e kemi vendin.
Anëtarësisë së LDK-së ju uroj; 26 vjetorin e themelimit të partisë e cila i shtroj themelet e demokracisë dhe afirmoj vullnetin e popullit për liri!
Duke shpresuar dhe duke besuar se do ti kthehemi traditës me vepra e jo me fjalë me punë e jo me korrupsion, me besim e jo me mashtrime, duke ruajtur miqësinë me të gjithë ata që na u gjenden pranë!
Urime!