Sylejmani: Studentët e duan bibliotekën të hapur për ta deri në ora 19:00!

/2L ONLINE/ – Studentët gjilanas, të cilët studiojnë ne Universitetin e Prishtinës, por edhe gjetiu, e që këtyre ditëve të verës qëndrojnë afër familjeve të tyre, ditëve të fundit kanë një shqetësim të arsyeshëm, sepse biblioteka e qytetit, salla e cila frekuentohet dhe shfrytëzohet kryesisht nga këta studentë po punon deri në ora 16:00.

Kështu shprehet Fehmi Sylejmani, nga Lëvizja Vetëvendosje, Qendra në Gjilan, sipas të cilit, kërkesa e tyre e vetme është që biblioteka të punojë dhe të jetë e hapur deri në ora 19:00, meqë kërkojnë kohë më të madhe për të studiuar dhe mësuar në hapësirat e bibliotekës së qytetit.

“S’do mend se kjo kërkesë e tyre është jo vetëm racionale, por edhe legjitime dhe e pranueshme për çdo njërin që posedon arsye ët shëndoshë”, thotë tutje Fehmi Sylejmani, që është edhe anëtar i Kuvendit Komunal.

Madje, ai thotë se këtë kërkesë të një grupi të madh të studentëve gjilanas e ka potencuar dhe ngritur si çështje edhe, hiç më larg se, në seancën e fundit të këtij kuvendi, por që nuk ka marrë asnjë përgjigje nga zyrtarët relevant të kësaj çështje.

“Jemi të vetëdijshëm se muaji gusht është pothuajse në tërësi “muaj i pushimeve”, mirëpo duhet gjetur mundësi dhe kapacitete të ndryshme, që t’ju dilet në ndihmë këtyre studentëve, të cilët vërtetë kanë vullnet dhe dëshirë për të mësuar. Është detyrë dhe përgjegjësi e të gjithë neve që kësaj kategorie t’i ndihmohet, për faktin që janë aq të interesuar për të kryer provimet e parapara, e që nuk janë larg, përkatësisht në afatin e shtatorit”, ka thënë Sylejmani. /2L ONLINE/