Superliga: Sot zhvillohen tri ndeshjet tjera të xhiros së 12-të, në fokus ndeshja Drita – Llapi

Albi Mall Superliga e Kosovës në Futboll, vazhdon sot me tri ndeshjet tjera të xhiros së 12-të dhe për adhuruesit gjilanas padyshim që fokusi është te ndeshja Drita – Llapi.

Ditë më parë, kryetrajneri  i Dritës, Zekirija Ramadani ka thënë se nga futbollistët ka kërkuar të japin maksimumin dhe se në ndeshjen ndaj Llapit pret të arrihet objektivi i vetëm që kanë në çdo lojë në kampionat, e që është fitorja dhe arkëtim i pikëve të plota.

Edhe futbollisti i Dritës, Ilir Mustafa ka thënë se janë të përgatitur maksimalisht dhe të fokusuar qind për qind, për 90-të minuta lojë që do të sjellin fitore për skuadrën e tij “bardh e kaltër”.

Përndryshe, sot na presin këto duele: Drita – Llapi, Dukagjini – Malisheva dhe Prishtina e Re – Drenica.

Të gjitha ndeshjet e sotme fillojnë në ora 13:00.

Kujtojmë se dje janë zhvilluar dy ndeshje tjera të kësaj jave: Prishtina – Gjilani 0:0 dhe Ballkani – Ferizaj 1:1.  /2LONLINE/