Suedia përkrah liberalizimin e vizave për Kosovën

Kryetari i Kuvendit të Republikës së Kosovës, Kadri Veseli, i shoqëruar nga nënkryetarët e Kuvendit, priti sot në takim kryetarin e Parlamentit të Suedisë, Urban Ahlin, i cili po qëndron për vizitë zyrtare në Kosovë në krye të një delegacioni parlamentar suedez, ne mesin e të cilit edhe deputeti me origjinë nga Kosova, Adnan Dibrani.

Të dy homologët biseduan për raportet e mira që parlamentet e të dyja vendeve kanë ndërmjet tyre, ndërsa u shtrua nevoja që ky bashkëpunim të thellohet edhe më tej në të gjitha nivelet e jetës parlamentare, posaçërisht në fushën e komisioneve dhe të administratave.

Duke i uruar kreut të Parlamentit të Suedisë mirëseardhje në Kosovë dhe në Kuvendin e saj, kryeparlamentari Veseli falënderoi kryetarin Ahlin për mbështetjen e vazhdueshme ushtarake, politike e ekonomike të shtetit suedez për Kosovën në të gjitha fazat, si dhe në aspektin e zgjerimit të njohjes ndërkombëtare të Kosovës e të procesit të integrimit evropian.

Veseli çmoi lart marrëdhëniet e deritashme ndërmjet dy vendeve, përkatësisht ndërmjet parlamenteve dhe avancimin e tyre gjatë viteve, por shtoi se ka rrugë dhe mundësi të tjera për ta rritur më tej këtë bashkëpunim. Kreu i legjislativit të vendit e konsideroi të vyer për Kosovën dhe Kuvendin e saj përvojën e gjatë demokratike e parlamentare të Suedisë, praktika të të cilës, konform rrethanave, mund të jenë të zbatueshme në vendin tonë.

Kreu i Kuvendit të Kosovës e njoftoi kryeparlamentarin Ahlin edhe për zhvillimet aktuale në Kosovë, me punën në procesin e liberalizimit të vizave, përpjekjet për njohje të reja dhe anëtarësim në një varg organizatash ndërkombëtare.

Nga ana e tij, kryetari i Parlamentit të Suedisë, Urban Ahlin, vizitën e tij në Kosovë dhe në Kuvendin e saj, e konsideroi një mundësi për të kontribuar më shumë në forcimin dhe avancimin e mëtejmë të marrëdhënieve që tashmë të dy shtetet dhe parlamentet respektive kultivojnë ndërmjet tyre.

Ahlin vlerësoi lart hapat zhvillimorë që ka bërë Kosova në të gjithë fushat, ndërsa shprehu gatishmërinë e shtetit të tij për ta vazhduar mbështetjen për Kosovën edhe në të ardhmen.

“Ne si shtet i Suedisë, i qëndrojmë ende prapa Kosovës dhe dëshirojmë ta përkrahim atë në të gjitha proceset e saj”, theksoi Ahlin.

Pas takimit Kryeparlamentari i Kosovës, Kadri Veseli tha se ishte një vizitë në momentin pas të gjitha atyre që kemi kaluar. Veçanëriaht pasi shumë familjarë kanë lëvizur drejt BE-së për një perspektivë me të mirë. E falënderova Suedinë për procesin e rimëkëmbjes dhe procesin e integrimit të Kosovës.

Kërkuam ndihmë në fushën e integrimeve veçanërisht kemi shumë interes për t’u anëtarësuar në Këshillin e Ecropës dhe OSBE.

Ndërkaq, Urban Ahlin tha se Suedia e përkrahë procesin e liberalizimit të vizave në Kosovës dhe procesin e integrimit të saj si dhe të vendeve të tjera të cilat dëshirojnë të bëhen pjesë e BE-së.

Suedia dëshiron që të gjithë popujve t’iu jepet mundësia që të lëvizin lirshëm. Kemi parë që numri i azilkërkuesve nga Kosova në Suedi po rritet.

Nga fillimi i këtij viti rreth 50 mijë veta kanë kërkuar azil dhe ky fakt nuk i ndihmon procesit të liberalizimit të vizave për arsye se në këtë rast shtrohet pyetja se sa do të jetë numri i personave që do të kërkojnë azil në momentin e liberalizimit të vizave.

Është e vërtetë që e kemi parë një ngritje të numrit të azilkërkuesve nga Kosova dhe ne jemi duke e trajtuar këtë çështje, por ju duhet ta dini se Suedia e përkrah liberalizimin për Kosovën dhe vendet e tjera të Ballkanit.