Studentët kërkojnë ndaljen e ikjes masive nga Kosova

Ikja masive e qytetarëve , veçmas e studentëve, e ka shqetësuar Parlamenti Studentor i Universitetit të Prishtinës, i cili kërkon ndërhyrjen e shpejt të Qeverisë dhe presidentes.

“Duke pare gjendjen e krijuar muajve të fundit, të skenave masive të ikjes së të rinjve nga Kosova, Parlamenti Studentor i Universitetit të Prishtinës ‘Hasan Prishtina’ shpreh shqetësimin e tij për gjendjen e krijuar, dhe njëherit kërkon nga Qeveria e Republikës së Kosovës dhe Presidenca , të ndërhyj sa më parë dhe të parandaloj emigrimin masiv të qytetareve të Republikës së Kosovës në drejtim të shteteve të BE-së”, thuhet në kumtesën e Parlamentit Studentor, transmeton Telegrafi.

“Kjo gjendje vjen si pasojë e humbjes së shpresës për një jete më të mirë në Kosovë. Papunësia e madhe, gjendja jo e mirë ekonomike dhe mungesa e një perspektive në vendin e tyre po i shtyn të rinjtë të braktisin vendin dhe të kërkojnë një jete më të mire jashtë Kosovës”.

“Mos krijimin i një tregu të sigurt të punës për studentët e diplomuar dhe ata që janë ende duke i vijuar studimet po i shtynë një numër të studenteve të braktisin studimet në Universitetin e Prishtinës”, thuhet në kumtesë.

“Ne si Parlament Studentor vlerësojmë që kjo gjendje është shqetësuese dhe alarmante për vendin prandaj kërkojmë që Qeveria të marr masat e nevojshme të ndaloj këtë dukuri”, përfundon kumtesa e Parlamentit Studentor.