DYLON

Studentët e UKZ-së diskutojnë me ministrin Hajrulla Çeku për sfidat e arsimit dhe Strategjinë 2035+

Studentët e UKZ-së diskutojnë me ministrin Hajrulla Çeku për sfidat e arsimit dhe Strategjinë 2035+
Redaksia

Në Universitetin Publik “Kadri Zeka” në Gjilan u mbajt bashkëbisedimi i Ministrit të Arsimit dhe Shkencës, z. Hajrulla Çeku, me studentët e Universitetit “Kadri Zeka” dhe studentët e tjerë të rajonit të Gjilanit, në kuadër të ciklit të konsultimeve rajonale për hartimin e Strategjisë Shtetërore të Arsimit 2035+.

Takimi, kishte për qëllim krijimin e një hapësire të hapur komunikimi ndërmjet ministrit dhe studentëve, ku këta të fundit patën mundësi të paraqesin drejtpërdrejt shqetësimet, kërkesat, vërejtjet dhe propozimet e tyre për përmirësimin e arsimit të lartë dhe orientimin e tij drejt nevojave të së ardhmes.

EkoHigjiena

Gjatë bashkëbisedimit, studentët ngritën një sërë çështjesh që lidhen drejtpërdrejt me përvojën e tyre akademike dhe kushtet e studimit. Ndër temat kryesore të diskutimit ishin angazhimi i profesorëve pas pensionimit, trajtimi i rasteve të shkeljeve etike, si dhe shqetësimet për trajtimin e barabartë të studentëve dhe zbatimin e kritereve të njëjta akademike për të gjithë.

Vëmendje e veçantë iu kushtua edhe nevojës për zgjerimin e mundësive për praktika profesionale me pagesë, veçanërisht për studentët e Fakultetit Ekonomik dhe Fakultetit Juridik, përfshirë krijimin e kushteve për simulimin e seancave gjyqësore. Studentët parashtruan gjithashtu pyetje lidhur me bursat, mungesat në ligjërata, infrastrukturën universitare dhe ndërtimin e kampusit.

Ministri Çeku, duke iu përgjigjur pyetjeve të studentëve, theksoi rëndësinë e raportimit të rasteve të parregullsive dhe të paraqitjes së fakteve konkrete. Ai i inkurajoi studentët që shqetësimet e tyre t’i adresojnë në mënyrë të organizuar dhe përmes mekanizmave institucionalë, duke theksuar se për çështjet që lidhen me shkeljet etike, mund t’i drejtohen edhe drejtpërdrejt Ministrisë.

Sa i përket praktikës profesionale, ministri theksoi nevojën që ajo të jetë pjesë e mirëfilltë e programeve studimore dhe të ndërlidhet me kërkesat e tregut të punës. Ai përmendi gjithashtu rëndësinë e bashkëpunimit ndërmjet universiteteve, institucioneve dhe sektorit ekonomik, në mënyrë që studentët të mos përfundojnë studimet pa përvojën e nevojshme praktike.

Një pjesë e diskutimit iu kushtua edhe profilizimit të universiteteve dhe harmonizimit të programeve studimore me nevojat reale të tregut të punës. Sipas ministrit, planifikimi i arsimit të lartë duhet të mbështetet në analiza të mirëfillta për kërkesat e tregut dhe zhvillimet demografike, duke synuar programe cilësore dhe mundësi më të mira punësimi për të diplomuarit.

Në kuadër të diskutimit për Strategjinë e Arsimit 2035+, ministri Çeku foli edhe për rëndësinë e reformimit të sistemit të përgatitjes dhe punësimit të mësimdhënësve, përmes provimit shtetëror për mësimdhënie, si një mekanizëm që synon rritjen e profesionalizmit dhe zvogëlimin e ndikimeve politike në proceset e punësimit.

Ministri theksoi se ndryshimet në arsim kërkojnë angazhimin e përbashkët të studentëve, prindërve, mësimdhënësve, universiteteve dhe institucioneve përgjegjëse, duke nënvizuar se Strategjia e Arsimit 2035+ duhet të ndërtohet mbi nevojat reale dhe me kontributin e të gjithë akterëve të sistemit arsimor.

Bashkëbisedimi u karakterizua nga pyetje dhe diskutime të drejtpërdrejta, duke shërbyer si mundësi që zëri i studentëve të jetë pjesë e procesit të hartimit të politikave për të ardhmen e arsimit në Kosovë. /2LONLINE/

Privatësia

Kjo faqe interneti përdor cookie në mënyrë që t'ju ofrojmë përvojën më të mirë të mundshme si përdorues. Informacioni i cookie-ve ruhet në shfletuesin tuaj dhe kryen funksione të tilla si njohja juaj kur ktheheni në faqen tonë, si dhe ndihmon ekipin tonë të kuptojë se cilat seksione të faqes ju duken më interesante dhe më të dobishme.