Sqarim: Jusuf Baftijari me propozim të LHK u dekorua me medalje presidenciale

/2L ONLINE/ – Pas publikimit të disa shkrimeve joautoriale e relativisht të lajthitura rreth biografisë së Jusuf Baftjarit alias Hoxhë Lipovicës dhe dekorimit të tij me medalje presidenciale, Lidhja e Historianëve të Kosovës “Ali Hadri” dega në Gjilan tërheq vëmendjen dhe sqaron opinionin se propozimin për dekorim nga Presidentja e Republikës së Kosovës, znj. Atifete Jahjaga, e ka bërë ky organ i historianëve në Gjilan, ndërsa Komuna e Gjilanit e ka mbështetur dhe dërguar listën e të propozuarve tek komisioni përkatës për vlerësimin e personaliteteve për dekorata. Më poshtë po paraqesim biografinë e shkurtër të të dekoruarit Jusuf Baftjari, e cila është hartuar nga historianët e LHK “Ali Hadri” dega në Gjilan dhe si e tillë është propozuar për dekorim.
Jusuf Baftjari – Hoxhë Lipovica, u lind më 1883 në Lipovicë të Gjilanit. Është njëri ndër atdhetarët shqiptar të Karadakut malor, bashkëluftëtari më i afërm i Mulla Idriz Gjilanit dhe ndër komandantët e njësive vullnetare në mbrojtje të kufirit të Kosovës Lindore. Pas okupimit fashist bullgar të një pjese të Rrethit të Gjilanit, në maj 1941, Hoxhë Lipovica formoi njësitin e tij të rezistencës, në krye të të cilit qëndroi me armë në dorë në mbrojtje të jetës dhe pasurisë së popullatës shqiptare të kësaj ane nga keqpërdoruesit bullgarë dhe bashkëpunëtorët e tyre serbë. Pas kapitullimit të Bullgarisë fashiste (9 shtator 1944), konform urdhëresës së Komitetit Qendror të Lidhjes së Dytë të Prizrenit për mbrojtjen e kufirit nga sulmet partizano-çetnike, Hoxhë Lipovica u caktua njëri ndër komandantët e zonave mbrojtëse të kufirit në vijën hekurudhore Bujanoc-Preshevë-Kumanovë. Më 19 shtator 1944, në ditën e Festës së Bajramit, u zhvillua beteja në Raincë të Preshevës, nën udhëheqjen e Jusuf Baftjarit në mbrotje të kufirit shqiptar nga depërtimi i forcave çetnike partizane serbe e bullgare. Pas përfundimit të Luftës së Dytë Botërore dhe okupimit sllavo-komunist të Kosovës, Hoxhë Lipovica, së bashku me disa bashkëluftëtarë, për një kohë qëndroi i fshehur në malet e Karadakut. Ai mori pjesë në Kongresin e Kopilaçës më 15 e 16 gusht 1945, të organizuar nga Komitetit Qëndror i NDSH-s dhe Shtabit Suprem të Lëvizjes së Rezistencës Shqiptare antijugosllave. Pas aksioneve të shumta ushtarako-policore jugosllave, duke i parë të gjitha mundësitë e mbyllura për të vazhduar rezistencën dhe pas mëse dy vjet qëndrimi në ilegalitet, më 20 shkurt të vitit 1947 dorëzohet me dy djemtë e tij dhe disa bashkëluftëtarë. Me Aktgjykimin P. nr. 37/48, më 23.04.1948, të Gjykatës së Qarkut në Gjilan, Hoxhë Lipovica dënohet me vdekje – pushkatim (ekzekutim), kurse djemtë Selimi me 17 vjet dhe Qazimi me 14 vjet burg të rëndë.

Me propozim të Lidhjes së Historianëve të Kosovës “Ali Hadri” – dega në Gjilan dhe me mbështetje të Komunës së Gjilanit, për nder të veprës së tij patriotike, Presidentja e Republikës së Kosovës, Znj. Atifete Jahjaga, në kuadër të aktiviteteve për shënimin e tetë vjetorit të Pavarësisë së Kosovës dhe në përputhje me procedurat përkatëse, më 19 shkurt 2016, e dekoroi Jusuf Baftjarin me medaljen “URDHRI I LIRISË”. /2L ONLINE/