Spiunët janë problemi!

Spiunët janë problemi!

Në njërin nga televizionet tona nacionale, u zhvillua një debat për ndikimin e shërbimeve inteligjente me qëllime armiqësore në drejtim të Kosovës, me theks të veçantë, për ato ruse.

Shkruan: Fadil Kajtazi

Debati ishte interesant, por kishte edhe të metat e tij, ku ndër me kryesoret ishte zbërthimi i mënyrave praktike të veprimit të këtyre shërbimeve në hapësirat kosovare dhe në ato me interes për Kosovën.

Efektet e aktiviteteve të shërbimeve inteligjente sikur të jenë parciale, siç i shpjegonte njëri nga panelistët, nuk e kanë fuqinë e ndikimit subversiv për një objektiv, në këtë rast për Kosovën.

Ato janë të gjithanshme, gjithëpërfshirëse dhe nuk mundë të zhvillohen pa përkrahjen e vendorëve (spiuneve) të strukturuar në pozitat me ndikim në jetën e përgjithshme shoqërore, ku politikanët, gazetarët, intelektualët, biznesmenët dhe udhëheqësit fetar janë më kryesorët, që këto shërbime rekrutojnë.

Pa këtë mbështetje, oficerët e shërbimeve inteligjente ruse e serbe mundë të vijnë e shkojnë sikur turistë të zakonshëm dhe ndikimet e tyre nuk kanë ndonjë efekt.

Në kushtet e veprimeve të sotme, detyra e këtyre shërbimeve është lufta speciale, apo hibride me të renë, e cila konsiston në doktrinën e veprimit “duke shkaktuar dhe menaxhuar kriza”, ku krijimi i kaosit realizohet përmes krijimit të kauzave, të cilat pastaj aplikohen në terren.

Këto i studiojnë dhe i artikulojnë grupe të specializuara të analitikëve të këtyre shërbimeve, kurse oficerët operativ sigurojnë agjenturën në rrethet me ndikim, të cilët duke i komprometuar ja dalin t’i rekrutojnë.

Mënyra e veprimit të aplikimit të kësaj lufte realizohet përmes një shablloni të veprimeve ku ndër më kryesorët janë:

1. Kamuflimin e veprimtarisë së fshehtë deri në masën që ajo të duket gjë e rëndomtë, duke e reduktuar në nivelin e një fatkeqësie elementare;
2. Sulmin masiv mbi popullatën ose grupet që e masivizojnë efektin;
3. Veprimtaria e fshehtë, të orientohet në fushat që kanë ndikim psikologjik te popullata, në mënyrë që me kalimin e kohës, ose të shkaktojnë gjendjen e depresionit dhe paperspektivës, ose të krijojë efekte që i konvenojnë agresorit, në këtë rast Serbisë apo Rusisë;
4. Dhe së fundmi, ndikimi në krijimin e masave të mëdha njerëzish që përhapin idenë se pushteti i agresorit (në këtë rast i Serbisë) është më i mirë.

Po i lë lexuesit t’i analizojë këto shabllone të veprimit.

Ky artikull nuk pasqyron qëndrim editorial të redaksisë! Për më tepër, ju lutem lexoni kushtet e përdorimit.

KOMENTE