Spitali prezanton punën përgjatë 2013-tes

(2LONLINE) – Drejtues të Spitalit Rajonal të Gjilanit përmes një konferencë të mbajtur sot kanë bërë prezantimin e  të arriturave dhe sfidat të Spitalit gjatë vitit 2013. Abdylatif Latifi ushtrues i detyrës së drejtorit të Spitalit Rajonal të Gjilanit , ka theksuar se gjatë vitit 2013 spitali ka funksionuar mirë në krahasim me kushtet e shëndetësisë Kosovare.

Latifi tha se sa i përket buxhetit spitali i Gjilanit tani qëndron më mirë. Sipas tij Spitali ka pasur një borxh prej 700 mijë eurove dhe tani ai borxh është shlyer dhe po e përmbyllim këtë vit me 103 mijë euro bilanc pozitiv.

“Duke parë kushtet e shëndetësisë kosovare spitali ka funksionuar mirë dhe ka pasur të arritura të theksuara. Vitin e kemi filluar me një borxh prej 700 mijë eurove , mirëpo 2013-tën po e përmbyllim me 103 mijë euro bilanc pozitiv” tha Latifi.

Për më tepër Latifi tha se menaxhmenti i tij është përpjekur që në Spitalin e Gjilanit të sjellë aparaturë moderne dhe tani ka në përdorim edhe tre ultrazëra dhe janë munduar që të sjellin edhe aparatura tjera mjekësore.
Ndryshe ai tha se aktualisht 4 mjek të këtij spitali po hetohen për vepra penale të ryshfetit derisa dy të tjerë akuzohen për veprat e kryera jashtë orarit të punës.

Duke folur për aspektin profesional Selvete Shurdhani është shprehur se janë shfrytëzuar vetëm 54% i kapaciteteve totale. Përderisa dr.Selami Kurteshi zëdhënës i Spitalit Rajonal të Gjilanit ka folur për strukturën e Spitalit duke thënë se në këtë institucion janë të punësuar gjithsej 552 punëtorë , 122 mjekë specialist, 342 infermierë, 70 punëtorë të shërbimit teknik dhe 28 punëtorë në administratë.

“Në kuadër të Spitalit veprojnë operator ekonomik që realizojnë shërbime në kuzhinën e Spitalit , higjienën dhe sigurimin fizik. Në Spital janë të punësuar 552 punëtor në të gjitha sektorët e saj’ tha Kurteshi.

/Edona JERLIU/