Spitali i Gjilanit pranon donacion të rëndësishëm, drejtori Afrim Cana falënderon donatorët

Spitali i Përgjithshëm i Gjilanit ka pranuar një donacion të rëndësishëm që pritet të ndikojë drejtpërdrejt në përmirësimin e shërbimeve shëndetësore dhe kujdesit ndaj pacientëve.

Lajmin e ka bërë të ditur drejtori i Spitalit të Përgjithshëm të Gjilanit, Dr. Afrim Cana, i cili ka shprehur mirënjohjen e tij për donatorët që kanë mbështetur institucionin shëndetësor.

Sipas Canës, donacioni është siguruar nga Xhamia “Shtëpia e Paqes” dhe Shoqata “Parandalo” me seli në Zyrih të Zvicrës, të cilat kanë kontribuar në avancimin e shërbimeve që ofron spitali.

“Ky donacion do të ndikojë në rritjen e cilësisë së trajtimit të pacientëve, do të lehtësojë punën e stafit shëndetësor dhe do të mundësojë ofrimin e kujdesit më efikas dhe më të sigurt për pacientët tanë”, ka deklaruar drejtori Cana.

Ai ka theksuar se mbështetjet e tilla janë të rëndësishme për zhvillimin e vazhdueshëm të institucionit dhe përmirësimin e kushteve në sektorin shëndetësor.

Nga Spitali i Përgjithshëm i Gjilanit kanë vlerësuar se bashkëpunimet me donatorë dhe organizata të ndryshme mbeten thelbësore për avancimin e shërbimeve dhe krijimin e kushteve më të mira për pacientët dhe personelin mjekësor. /2LONLINE/