Spitali i Gjilanit organizon kontrolle falas dermatologjike për qytetarët

Spitali i Përgjithshëm i Gjilanit i është bashkuar fushatës për vetëdijesimin dhe parandalimin e melanomës, duke organizuar kontrolle falas dermatologjike për qytetarët.

Melanoma konsiderohet forma më serioze e kancerit të lëkurës, ndërsa mjekët theksojnë se diagnostikimi i hershëm rrit dukshëm mundësinë për shërim dhe mund të shpëtojë jetë. Për këtë arsye, vetëdijesimi dhe kontrollet preventive mbeten ndër mënyrat më të rëndësishme për mbrojtjen e shëndetit të lëkurës.

Në kuadër të kësaj iniciative, kontrollet falas për nishane dhe ndryshime të lëkurës do të mbahen më 22 maj 2026, në dy termine: nga ora 10:00 deri në 11:00 dhe nga ora 13:00 deri në 14:00.

Kontrollet do të realizohen në ambulancën dermatologjike të spitalit nga dermatologet: Dr. Ibadete Haziri, Dr. Dafina Devaja dhe Dr. Ajshe Shurdhani.

Nga Spitali i Gjilanit u bëhet thirrje qytetarëve që të përfitojnë nga kjo mundësi për kontrolle preventive dhe për kujdes më të mirë ndaj shëndetit të lëkurës.  /2LONLINE/