Sot zhvillohen dy ndeshje të xhiros së 32-të të Superligës

Superliga e Kosovës në Futboll rikthehet sot me dy ndeshjet e xhiros së 32-të, ku takohen: Prishtina e Re – Drita dhe  Prishtina – Malisheva. Deri në fund të kampionatit janë edhe pesë javë andaj ndeshjet janë tejet të rëndësishme për skuadrat që kanë objektiva të qarta, duke përfshirë edhe skuadrat që i zhvillojnë sot takimet.

Kampioni aktual FC Drita, që kryeson tabelën me 60 pikë, synon fitore për ta ruajtur distancën ndaj Ballkanit, që ka 55 pikë, ndërkohë që edhe Prishtina e Re, synon fitore, për të mbajtur shpresat për mbijetesë në Superligë, edhe pse është tejet vështira pasi është e fundit me 28 pikë.

Duke iu referuar gjendjes momentale në tabelën e klasifikimit, edhe ndeshja tjetër është me rendësi të madhe, për një pozitë që mundëson daljen në garat evropiane, e që e synojnë edhe Prishtina edhe Malisheva, të cilat ballafaqon mes vete.

Malisheva është e tretë me 49 pikë, e Prishtina e katërta me 45 pikë, prandaj  pikët janë të rëndësishme për të dyja skuadrat për synimet që i kanë. 

Përndryshe, sipas orarit, tri ndeshjet tjera të kësaj xhiroje luhen nesër, takohen: Gjilani – Ferizaj, Dukagjini – Drenica dhe  Ballkani -Llapi. /2LONLINE/