Sot, 239 vjet nga Pavarësia e SHBA-së

Çdo vit, më 4 korrik, Shtetet e Bashkuara të Amerikës (SHBA) festojnë Ditën e Pavarësisë, datë kjo kur më 1776, 13 kolonitë e para amerikane shpallën pavarësinë nga Mbretëria Britanike.

E për çdo vit, pavarësia e SHBA-së festohet edhe në Kosovë nga ambasada amerikane në Prishtinë. Për kremtimin e Ditës së Pavarësisë së SHBA-së, më 2 korrik, morën pjesë krerët e shtetit të Kosovës, ku falënderuan shtetin amerikan për ndihmën e dhënë që qytetarët e Kosovës sot të jetojnë në paqe dhe të lirë.

Ambasadorja amerikane, Tracy Ann Jacobson, është shprehur e lumtur që dy shtetet janë miq dhe i ka falënderuar të pranishmit për pjesëmarrje.
Ndërkaq presidentja e Kosovës Atifete Jahjaga me rastin e përvjetorit të pavarësisë së Shteteve të Bashkuara të Amerikës ka thënë se duhet t’i shprehet mirënjohje SHBA-së për dedikimin e saj të paepur për paqen, lirinë dhe demokracinë anekënd botës.

E para e vendit ka theksuar se në secilin moment dhe në secilën kthesë populli i Kosovës e kishte pranë SHBA-në, ku kaluan së bashku shumë pengesa dhe bashkërisht iu gëzuan të arriturave deri në ndërtimin e një vendi demokratik dhe të qëndrueshëm.
http://www.epokaere.com/index.aspx?SID=13&PMID=2&LID=2&ACatID=1&AID=65923&Ctype=1