Sonte, sytë e zemra kah kryeqendra!

FC Drita po vazhdon rrugën e saj në garat evropiane dhe sipas orarit, sot në kryeqendër, në stadiumin “Fadil Vokrri” në Prishtinë, skuadra “bardh e kaltër”, do të ballafaqohet me skuadrën Omonia Nicosia nga Qipro, ndeshje kjo në kuadër të garave të fazës së grupeve në UEFA Conference League.

Futbollistët e Dritës do të zbresin në fushë për të dhënë maksimumin dhe regjistruar suksesin e radhës.

Ditë më parë, trajneri i skuadrës gjilanaae, Zekirija Ramadani ka thënë se do të hyjnë në fushë për ta fituar ndeshjen duke u bazuar në karakterin e fortë të futbollistëve.

“Shpresoj t’a mbajë portën tonë të paprekur dhe t’i marrim tri pikët e tona të para”, ka deklaruar trajneri i FC Drita, Zekirija Ramadani.  

Edhe futbollisti i Dritës, Jorgo Pëllumbi tha se do të hyjnë për të dhënë maksimumin dhe se në këtë drejtim ka kërkuar edhe mbështetjen e tifozerisë edhe atë jo vetëm të intelektualëve, por të krejt Kosovës, ngase siç është shprehur ai: “Presim një mbështetje të madhe prej tifozëve jo vetëm nga intelektualët, por edhe nga tifozët e gjithë kombit sepse Drita nuk përfaqëson vetëm qytetin, por gjithë kombin”, transmeton 2LONLINE.com.

Dihet se, FC Drita, me kundërshtarin e parë, skuadrën nga Finlanda, KuPS Kuopio, në Tammela Stadion – Tampere, kishte barazuar (1:1), dhe kjo është ndeshja e dytë.

Përndryshe, në këtë rrugëtim evropian kundërshtarët e Dritës, përveq KuPS Kuopio dhe Omonia Nicosia janë edhe Shelbourne (Irlandë), AZ Alkmaar (Holandë), Shkëndija (Maqedonia e Veriut) dhe Rayo Vallecano (Spanjë).  /2LONLINE/