Sonte në Teatrin e Qytetit vjen shfaqja “Dredhit’ e Patukut”
Sonte, e shtunë, 20:00h | “Dredhit’ e Patukut” | nga Gjergj Fishta, regjia Kushtrim Bekteshi | produksion nga Teatri i Tetovës.
Komedia “Dredhit’ e Patukut” nga Gjergj Fishta, është shkruar diku mes viteve 1910-1913. Brumin e kësaj komedie Gjergj Fishta e ka marrë nga vepra e Molierit “Les Fourberies de Scapin” të cilën e ka adaptuar, rishkruar dhe përshtatur me traditën dhe kulturën shqiptare, dhe kontekstin kohor të qytetit të Shkodrës në fillim të shekullit të XX.
Në qendër të komedisë është Patuku, dredharak, rolin e të cilit e luan Arsim Fazlia. Ai mjeshtërisht, arrin të zhvat para nga baballarët e pasur e koprracë për t’iu ndihmuar dy fëmijëve të tyre të shthurur që të shpëtojnë nga telashet dhe borxhet e mëdha në të cilat kanë hyrë gjatë mungesës së baballarëve në shtëpi. Koprracia e të moshuarve, jeta e shthurur e të rinjve, miqësia dhe intriga janë temat kryesore që trajton kjo komedi, e cila integron me mjeshtëri traditën shqiptare me ‘commedia dell’arte’- n italiane.
Në këtë shfaqje ‘commedia dell’arte’ është parafrazuar në stilin e aktrimit dhe ndërtimin e karaktereve, në skenografinë e shfaqjes e realizuar nga Betim Zeqiri, e po ashtu edhe në kostumografinë e realizuar nga Emira Ymeri, ku është kombinuar kostumi tradicional shqiptar me modën qytetare shkodrane të fillimit të shekullit të XX.
Kjo vepër e Fishtës gjatë kohës është konsideruar e zhdukur. Për më shumë se 50 vjet e vetmja kopje e mbijetuar, dorëshkrimi i komedisë “Dredhit’ e Patukut”, është ruajtur e fshehur nën dërrasat e dyshemesë në shtëpinë e zotëri Luigj Babës dhe kështu i ka shpëtuar zhdukjes gjatë periudhës së errët komuniste ne Shqipëri, kur Gjergj Fishta ishte i ndaluar dhe librat e tij ishin anatemuar, digjeshin dhe çdokush që i ruante rrezikonte burgun.
Në vitin 2005 djali i tij, Gjovalin Baba, e ka nxjerrë nga poshtë dyshemesë dhe e ka dorëzuar në bibliotekën françeskane në Shkodër.
Kjo komedi e Fishtës i ka shpëtuar zhdukjes falë bujarisë dhe guximit të kësaj familjeje shkodrane.
Komedia “Dredhit’ e Patukut”, derisa qe gjallë Gjergj Fishta, është luajtur nga priftërinjtë dhe shumë grupe amatore të asaj kohe. Ndërsa vënia në skenë e këtij teksti nga Teatri i Tetovës do të jetë hera e parë që ky tekst jetësohet në skenën e një teatri profesionist.
/Teatri i Qytetit – Gjilan/