Sonte ne Teatrin e Gjilani vjen shfaqja “Stiffler”

Sonte | e enjte, 20:00 | shfaqja “Stiffler”

Në një mëngjes krejtësisht të rëndomtë, Hava, një punëtore seksi mbi të 40-tat, futet në dhomën e pranimit të emergjencës së spitalit me një thikë të ngulur në shpinë, një natë më parë nga një klient i saj.

Prej këtu fillon sorollatja 24-orëshe e gruas së therur me thikë në shpinë nëpër institucionet shëndetësore dhe në ato të rendit e sigurisë, duke thirrur kot për vëmendje për hallin e saj.

E hutuar, e frikësuar, e dërrmuar nga dhembja, ajo kërkon ndihmë, ka nevojë për mjek, do që keqbërësi të kapet. Por me të kuptuar natyrën e punës së saj, këto institucione e fusin atë në një cikël brutal të marrjes në pyetje, shqyrtimit krejtësisht banal të rrethanave, motivit; e kundërshtojnë me diskurs administrativ kërkesën e saj të thjeshtë për mjek, për trajtim, për drejtësi, duke e shpërfillur thirrjen e saj të sinqertë për ndihmë, dhe duke refuzuar me arrogancë ta shohin thikën në shpinën e saj si krim.

“Stiffler” është rrëfim për një shoqëri që përdor moralin si kriter për shfaqje të njerëzisë e ofrim të ndihmës; për një sistem që e ka të internalizuar bindjen se trupi i një gruaje të “pamoralshme” më parë duhet të gjykohet vetë si vepër penale se sa të këqyret si dëshmi e një krimi të dhunshëm.

Dhe, përfundimisht, është rrëfim për lehtësinë e amnistimit të dhunës, keqbërësit, e krimit të kryer në emër të virtyteve të shoqërisë.

Regjisor: Kushtrim Koliqi

Autore: Dori Basha

Aktorët: Rebeka Qena, Adrian Morina, Armend Smajli

/Teatri i Qytetit – Gjilan/