Sonte në Galerinë e Arteve në Gjilan hapet Ekspozita “Rikthimi në shtëpi”
Sonte, me fillim në ora 19:30, në Galerinë e Arteve në Gjilan, hapet Ekspozita “Rikthimi në shtëpi”, kuruar nga Malisa Zymberi.
Njoftimi i plotë nga Drejtoria për Kulturë Rini dhe Sport – Gjilan.
***
Ekspozitë
“Rikthimi në shtëpi”
Kuruar nga Malisa Zymberi
Galeria e Arteve
11.04.2025
19:30
Rikthimi në Shtëpi – Babit, 2025
Malisa Zymberi
M: “Po bëhet çdo ditë e më e vështirë të jetoj pa shikimin e babit drejt meje, plot dashuri dhe admirim.”
F: “Atëherë merr sytë e babit e dashtun Malisa dhe fillo ta shikosh botën, me të njëjtën dashuri dhe admirim.”
“Rikthimi në Shtëpi – Babit” është një ekspozitë e ndërtuar mbi kujtimet, imazhet dhe videot e ruajtura në arkivin e Bajram Zymberit (1950–2023), babait të autores, Malisa Zymberi. Ai ishte një nga fotografët e parë në qytetin e Gjilanit, duke dokumentuar për më shumë se dy dekada (1970 – 1990) jetën e përditshme me kamera të rralla të atyre viteve.
Ky arkiv përmban përditshmërinë e familjeve, rrugët e qytetit, shfaqjet teatrale, festat me shoqëri dhe kujtimet që shpesh humbin mes rrjedhës së kohës. Pas ndarjes së tij nga jeta, Malisa përdori fotografitë e tij për t’u përballur me humbjen dhe si një mënyrë për ta parë botën përmes lenteve të tij, duke kërkuar kuptim në mënyrën e jetesës së asaj kohe.
Kjo ekspozitë është një kujtim për babain e autores dhe një mënyrë për ta rikthyer atë në shtëpi, për here të fundit. /2LONLINE/