Sonte KV Drita zhvillon ndeshjen e dytë të finales ndaj KV Ferizaj

Sonte, (e shtunë) nga ora 20:00 në palestrën e qytetit në Kamenicë luhet ndeshja e dytë e finales së madhe në volejboll në Raiffeisen Superligën A për meshkuj, ku KV Drita në cilësinë e nikoqirit pret skuadrën KV Ferizaj.

Siç dihet ndeshjen e parë e ka fituar Drita (Ferizaj 2:3 Drita – Setet: 22:25, 13:25, 25:18, 25:23, 10:15)

Drejtuesit e KV Drita kanë thënë se pas fitores në ndeshjen e parë, djemtë e skuadre bardh e kaltër hyjnë të motivuar për të dhënë maksimumin në parket për një tjetër super ndeshje dhe spektakël volejbolli, e natyrisht edhe fitore, transmeton Portali 2LONLINE.com.

”Ju ftojmë të gjithë ju që keni mundësi të jeni prezent në palestër, ta përkrahim skuadrën bardh e kaltër dhe djelmoshat e rinj që vijnë pas fitores nga ndeshja e parë. Për gjithë ju që dëshironi të jeni pjesëmarrës në ndeshje sonte, nisja bëhet nga ora 18:30 nga palestra ‘Bashkim Selishta-Petriti’ në Gjilan”, thuhet në njoftimin e skuadrës.

Përndryshe, Për t’u shpallur kampion në Raiffeisen Superligën A për meshkuj nevojiten të realizohen tri fitore në total.   /2LONLINE/