Sokol Haliti: Urime Dita e Çlirimit të Kosovës!

12 Qershori – Dita e Çlirimit të Kosovës

Sot, me krenari dhe mirënjohje të thellë, shënojmë 27-vjetorin e hyrjes së forcave të NATO-s në Kosovë, një nga ngjarjet më të rëndësishme në historinë moderne të vendit tonë.

Më 12 qershor 1999, pas 78 ditëve të ndërhyrjes së Aleancës Veri-Atlantike kundër forcave ushtarake dhe policore serbe, forcat e NATO-s hynë në Kosovë, duke i dhënë fund luftës, spastrimit etnik dhe vuajtjeve të popullit tonë. Kjo ditë shënoi fillimin e një epoke të re lirie, paqeje dhe shprese për Kosovën.

Hyrja e NATO-s dhe vendosja e misionit paqeruajtës të KFOR-it krijuan kushtet për kthimin në shtëpitë e tyre të mbi një milion qytetarëve të dëbuar me dhunë nga Kosova, duke hapur rrugën e rindërtimit të vendit, konsolidimit të institucioneve demokratike dhe ndërtimit të shtetit që gëzojmë sot.

Në këtë ditë të rëndësishme historike, kujtojmë me respekt kontributin e Presidentit historik Dr. Ibrahim Rugova në ndërkombëtarizimin e çështjes së Kosovës dhe angazhimin e tij të vazhdueshëm për liri, demokraci dhe paqe. Po ashtu, nderojmë luftën çlirimtare të Ushtrisë Çlirimtare të Kosovës dhe kujtojmë me respekt të gjithë dëshmorët, martirët dhe qytetarët e pafajshëm që sakrifikuan dhe përjetuan vuajtje në rrugën e Kosovës drejt lirisë.

Në këtë përvjetor, shprehim falënderimin dhe mirënjohjen tonë të përhershme ndaj Shteteve të Bashkuara të Amerikës, vendeve anëtare të NATO-s dhe mijëra ushtarëve të KFOR-it, të cilët për më shumë se dy dekada kanë kontribuar në ruajtjen e paqes, sigurisë dhe stabilitetit në Kosovë. Miqësia dhe partneriteti me aleatët tanë mbeten ndër vlerat më të çmuara të shtetit tonë.

12 Qershori mbetet simbol i fitores së lirisë mbi shtypjen, i dinjitetit njerëzor mbi dhunën dhe i triumfit të vlerave demokratike. Kjo ditë na kujton se liria e Kosovës u arrit falë sakrificës së popullit tonë dhe mbështetjes vendimtare të miqve dhe aleatëve tanë ndërkombëtarë.

Duke nderuar të kaluarën dhe ata që bënë të mundur lirinë tonë, mbetemi të përkushtuar për të ndërtuar një Kosovë gjithnjë e më të zhvilluar, demokratike, të sigurt dhe të orientuar drejt vlerave euroatlantike.

Urime Dita e Çlirimit të Kosovës!

Sokol Haliti
Kryetar i Komunës së Vitisë