S’ka kuorum për seancën e orës 10:00, ftohet sërish seancë për në ora 16:00

Opozita LDK e PDK, edhe kësaj here nuk iu përgjigj seancës urgjente të ftuar nga kryetari i kësaj komune, Alban Hyseni, me pikën e vetme të rendit të ditës miratimin e buxhetit për vitin 2025.

Për më tepër, sot nuk ishte i pranishëm as kryesuesi i Kuvendit, Kushtrim Kadriu që vije nga Lëvizja Qytetare “Vatra”.

Në mungesë kuorumi u mbyll seanca por që, kryetari i Komunës, Alban Hyseni, në një konferencë menjëherë pas seancës, tha se do të fton sërish seancë, po sot, në ora 16:00.

Përndryshe, seanca e orës 10:00, u drejtua nga anëtari më i vjetër i kuvendit komunal, Ismajl Kurteshi, i cili, pas verifikimit nga sekretaria e anëtarëve prezentë dhe konstatimit që nuk ka prezencë të mjaftueshme për kuorum, e mbylli seancën.

Por, ai paraprakisht u ka bërë thirrje palëve, si pozitës (kryetarit të komunës) si opozitës, për tejkalim situate, i pari të harmonizoj buxhetin në konsultim me opozitën e opozita ta votojë buxhetin.  /2LONLINE/