Sinani kërkon inkasimin e borgjeve ndaj komunës, por edhe që të paguhen obligimet ndaj operatorëve

/2L ONLINE/ – Kryetari i Komunës së Kamenicës, Begzad Sinani ka mbajtur sot një takim me zyrtarët e Drejtorisë së Buxhetit dhe Financave pr të diskutuar gjendjen financiare të komunës në dhjetë mujorin e këtij viti.

Në këtë takim kryetari Sinani kërkoi përkushtim sa më të madh të drejtorisë për të inkasuar të hyrat komunale.

“Nuk jam i kënaqur si kryetar i komunës me performancën e treguar deri më tani, ju inkurajoj që të angazhoheni maksimalisht në grumbullimin e të hyrave komunale si dhe në inkasimin e borgjeve të vjetra që janë ndaj komunës. Gjithashtu kërkoj prej jush që të paguhen të gjitha obligimet ndaj operatorëve të ndryshëm në mënyrë që komuna të rikthej besueshmërinë e operatorëve ndaj komunës dhe të konsiderohet si një institucion shumë serioz” tha Sinani.

Në takim zyrtarët e Drejtorisë së Buxhetit dhe Financave njoftuan për inkasimet e deritanishme të cilat u vlerësuan të jenë rreth 7% më të larta krahasuar me periudhën e njejtë të vitit të kaluar.
Gjithashtu u theksua se ditëve të fundit ka një hezitim nga ana e qytetarëve për të paguar obligimet, sidomos pas miratimit të vendimit për faljen e borgjeve nga ana e Qeverisë së Republikës së Kosovës.

Për këtë pikë kryetari Sinani kërkoi që të njoftohen qytetarët se përfitues nga falja e borgjeve do të jenë vetëm ata që shlyejnë pjesën e mbetur të borgjit pas vitit 2008. /2L ONLINE/