Siguria në fokus: Kryetari Hyseni pret komandantin e KFOR-it

Kryetari i  komunës së Gjilanit, Alban Hyseni, ka pritur në një takim zyrtar komandantin e Komandës Rajonale-Lindje të KFOR, kolonelin Sam Sargeant, në kuadër të bashkëpunimit institucional.

Gjatë këtij takimi, palët diskutuan për situatën e përgjithshme të sigurisë në komunë dhe rëndësinë e ruajtjes së një ambienti të qetë dhe të sigurt për qytetarët. Kryetari Hyseni theksoi se bashkëpunimi me KFOR-in mbetet kyç për stabilitetin lokal dhe rajonal.

“Diskutuam gjerësisht për sigurinë në Gjilan dhe për prioritetet tona komunale, duke rikonfirmuar gatishmërinë e përbashkët për të vazhduar këtë partneritet të shkëlqyeshëm në shërbim të stabilitetit”, ka deklaruar Hyseni.

Ai gjithashtu e njoftoi kolonelin Sargeant me prioritetet e komunës, ndërsa u vlerësua lart roli i KFOR-it në mbështetjen e sigurisë publike.

Takimi u cilësua si një hap i rëndësishëm në forcimin e bashkëpunimit ndërinstitucional, duke dëshmuar angazhimin e vazhdueshëm për ruajtjen e paqes dhe stabilitetit rajonal.   /2LONLINE/