Shtyhet për dy jave mbledhja e gjashte e Kuvendit Komunal të Vitisë

Mbledhja e gjashtë e Kuvendit Komunal të Vitisë është ndërprerë dhe shtyrë për dy javë, pas dy pauzave të kërkuara për konsultime lidhur me pikën e rendit të ditës për propozim vendimin për dhënie në shfrytëzim të një prone komunale në fshatin Devajë.

Ndonëse seanca kishte nisur në orën 10:00, pas diskutimeve për rendin e ditës, me propozim të zv.kryetarit të komunës Hasan Aliu, u kërkua që të shtyhen dy pika të parapara, përfshirë edhe propozim vendimin përfundimtar për dhënien në shfrytëzim të pronës komunale në Devajë.

Pas pauzës së parë për konsultime të grupeve parlamentare, seanca ishte shtyrë për në orën 13:00, mirëpo edhe pas konsultimeve të mëtejshme, kryesuesi i Kuvendit Komunal, Bekim Azizi, vendosi ta shtyjë mbledhjen për dy javë, me arsyetimin që t’u jepet hapësirë procedurave ligjore dhe interpretimeve përkatëse.  /2LONLINE/