Shtohet fluksi i pacientëve, vlerësohet normale për këtë kohë!

(2L ONLINE) – Ndryshim i i temperaturave, ngritja e tyre në këto muaj të verës, ka bërë që të rritet edhe fluksi i pacientëve që po e kërkojnë ndihmë mjekësore në institucionet shëndetësore, qofshin publike a private në Komunën e Gjilanit. E me telashe shëndetësore po atakohen veçmas fëmijët, sikundër edhe mosha e shtyrë, e sidomos ata me sëmundje kronike.

Sipas drejtuesve të Qendrës Kryesore të Mjekësisë Familjare (QKMF), ngritja e fluksit të pacientëve është normale për muajt e verës e sidomos në muajt korrik e gusht, por se janë ndërmarrë të gjitha masat që ky fluks të përballohet pa ndonjë problem.

Fejzullah Berisha, drejtor i QKMF-së ka bërë me dije për portalin 2L ONLINE, se muajt e nxehtë kanë rritur numrin e atyre që e frekuentojnë QKMF-në dhe qendrat tjera të Mjekësisë Familjare si dhe punktet shëndetësore për të kërkuar ndihmën e mjekut dhe se sipas tij janë fëmijët dhe mosha e vjetër, sidomos të sëmurit kronik, që kërkojnë tretman.

Berisha tha se nuk ka vend për shqetësim pasi është e pritshme që në këtë kohë me temperatura më të larta të ketë shtim të numrit të qytetarëve që kërkojnë ndihmën e mjekut, por se ai shtoi se stafi i QKMF-së, por edhe i qendrave tjera mjekësore dhe i punkteve është i përkushtuar maksimalisht që të jetë në shërbim të përhershëm të qytetarëve, andaj ata asnjëherë nuk duhet të hezitojnë, por duhet t’i kërkojnë shërbimet e mjekut, sa herë që kanë nevojë për to, sepse ato do tu ofrohen shpejtë e me cilësi.

Berisha i ka rekomanduar qytetarët që t’i shmangen ekspozimit të temperaturave të larta sidomos mes orëve 11:00-17:00. Kjo vlen sidomos për të moshuarit, fëmijët dhe personat me probleme shëndetësore të cilët duhet të qëndrojnë në vende të freskëta, të freskojnë pjesët e trupit dhe të përdorin ujë natyralë dhe sa më shumë lëngje.

Përndryshe, tek rastee paraqitura, janë evidente ato që për rrjedhojë kanë shkaktimin e tugut – të vjellurave dhe barkqitje, si rrjedhojë e ndonjë helmimi, e ku më tepër janë të atakuar fëmijët. Ata marrin trajtimin e duhur, ndërsa nëse ka raste më të rënda, referohen për Spitalin Rajonal.

Prandaj, drejtori i QKMF-së Fejzullah Berisha kërkon nga qytetarët të kenë kujdes në përdorimin e ushqimit, ku produktet duhet të jenë të freskëta dhe të kujdesen shumë për higjienën e duarve kur të hanë, por edhe të asaj që e konsumojnë, e cila po ashtu duhet shikuar të jetë me afat të përdorimit.

Përndryshe, si masë e ndërmarrë në këtë kohë kur kemi më tepër pacientë, Berisha ka përmendë atë në kujdestarinë e natës, ku tani kemi tre mjekë, e ku janë ndarë fëmijët nga të rriturit, me të cilët merret mjeku përkatës. /2L ONLINE/