Shqiptarët e Luginës drejt Beogradit, në përkrahje të kombëtares

Rreth 100 tifozë shqiptarë nga Lugina e Preshevës, të martën do të qëndrojnë në stadiumin ku do të luhet ndeshja mes dy kombëtareve, asaj serbe dhe shqiptare.

Tifozët nga komunat Preshevë e Bujanoc kanë arritur të sigurojnë biletat e nevojshme për të qenë afër lojtarëve të tyre të zemrës.

Portali informativ Titulli.com ka mësuar se rreth 100 tifozë do të jenë prezentë në stadiumin e KF Partizanit në Beograd, ku do të zhvillohet ndeshja e shumëpritur.

Preshevarët, përveç mbështetjes në Beograd, për pjesën tjetër të sportdashësve që kanë mbetur në Luginë, kanë organizuar edhe shikim të ndeshjes në ekran të madh, në stadiumin e qytetit, duke filluar nga ora 20:00.

Nga ana tjetër edhe tifozët serb, në hyrje të Preshevës, në Tasjan, do të qëndrojnë në hapësirë të hapur ku me ndihmën e video-projektorit do të përcjellin këtë ndeshje.

Futbollistët e kombëtares shqiptare kanë arritur sot në aeroportin e Beogradit, ku janë pritur nga gazetarët dhe forcat policore serbe, ndër ta edhe njësitet speciale anti-terrorizëm.

Në kampin kuqezi entuziazmi është i lartë, për arritjen e një rezultati historik përballë një kundërshtari të vështirë.

Ndeshja Serbi – Shqipëri zhvillohet të martën në orën 20:45 në stadiumin e KF Partizanit.