Shqipëria luan kundër Maltës më 5 mars

Kombëtarja kuqezi do të zhvillojë ndeshjen e parë zyrtare për vitin 2014 më 5 mars në shtëpi. Pasi të ketë mësuar kundërshtarët e vet në fazën e grupeve kualifikuese për “Euro 2016”, skuadra e drejtuar nga trajneri De Biasi do të zhvillojë edhe testin e parë miqësor.

Gjithçka është zyrtarizuar një ditë më parë dhe do të zhvillohet në kuadër të datës së lirë të FIFA-s, raporton Panoramasport. Kjo ndeshje është shumë e rëndësishme për De Biasin dhe kandidatët e mundshëm për të qenë pjesë e kombëtares shqiptare. Kundërshtari përballë kuqezinjve, ndonëse me koeficent më të dobët në renditjen botërore të FIFA-s, do të zbresë në Shqipëri me formacionin e vet më të mirë. Edhe kuqezinjtë, natyrisht, janë të interesuar që të luajnë me titullarët dhe të paraqesin vlerat e tyra më të mira, aq më tepër që luhet përpara sportdashësve të zjarrtë kuqezinj.

Ndeshja e fundit me Maltën është luajtur në kuadrin e fushatës eliminatore në grupe të Botërorit 2010, teksa Shqipëria drejtohej nga holandezi Ari Han. Në “Qemal Stafa”, Shqipëria do të fitontoe asokohe (10.09.2008) me rezultatin 3-0, ku golat mbanin autorësinë e Bogdani 46’, K.Duro 84’ dhe Dallku 90’. Mes dy kombëtareve ka diferenca të konsiderueshme, ndaj ky kundërshtar i radhës për të besuarit e De Biazit mund të vlerësohet si i dorës së tretë. Këtë e dëshmon edhe renditja e fundit mujore e FIFA-s, ku Shqipëria mban vendin e 56-të me 571 pikë, ndërsa Malta në vendin e 130-të, me 198 pikë.