Shoqata Humanitare “Bereqeti” vazhdon me aktivitete bamirësie

Sot, Shoqata Humanitare Bereqeti, dega në Gjilan, ka realizuar një aktivitet bamirësie duke ofruar ndihmë me veshmbathje dhe qarshaf për Shoqatën e Hendikosit dhe Shoqatën e të Verbërve në Gjilan.

Koordinatori i Shoqatës, Iljaz Mustafa thotë se ky aktivitet u zhvillua në kuadër të angazhimit të vazhdueshëm të shoqatës për të mbështetur kategoritë më të ndjeshme të shoqërisë dhe për të promovuar solidaritetin social.

“Ndihmat e dhuruara synojnë të lehtësojnë sadopak nevojat e përditshme të anëtarëve të këtyre shoqatave, duke dëshmuar përkushtimin e Shoqatës Bereqeti ndaj humanizmit dhe ndihmës së ndërsjellë”, ka thënë Mustafa.

Përfaqësuesit e shoqatave përfituese shprehën mirënjohjen e tyre për këtë gjest domethënës, duke theksuar rëndësinë e mbështetjes së tillë për komunitetin që ata përfaqësojnë.  /2LONLINE/