Shkrimtarit Ibrahim Kadriu i jepet “Çelësi i Qytetit”

“Sot pata nderin dhe kënaqësinë e veçantë që t’i ndaj Çelësin e Qytetit shkrimtarit tonë të njohur, z.Ibrahim Kadriu. Ai është figurë e shquar e letërsisë shqipe dhe krijues që me veprat e tij ka lënë gjurmë të pashlyeshme në identitetin tonë kombëtar”, ka thënë kreu i komunës së Gjilanit, Alban Hyseni.

“Çelësi i Qytetit” është mirënjohje për kontributin e Kadriut që edhe sot e kësaj dite vazhdon ta japë, transmeton 2LONLINE.com.

“Po ashtu, kam propozuar që Ibrahim Kadriu të nominohet nga Kuvendi Komunal për Çmimin “Nderi i Qytetit të Gjilanit”, si dhe të propozohet te Presidentja znj. Dr. Vjosa Osmani, që të nderohet me Medalje Presidenciale, për kontributin e dhënë në pasurimin e gjuhës shqipe dhe promovimin e kulturës”, ka thënë kryetari Hyseni. 

Drejtori i Kulturës, Rinisë e Sportit, Kushtrim Zeqiri, tha se është një ditë e veçantë, pasi po i dorëzojmë çmimin “Çelësi i Qytetit”  shkrimtarit Ibrahim Kadriut, i cili mbetet njëri ndër personalitetet më të rëndësishme të letrave shqipe të kohës sonë.

Duke iu referuar thënies së vjetër popullore se “Guri i rëndë peshon në vend të vet (vendlindje)”, falënderues për këtë mirënjohje u shpreh edhe shkrimtari Ibrahim Kadriu, i cili tha se edhe në veprat e tija, tani më të shumta, është përkujdesur që në to të kenë vend këto ane dhe njerëzit e kësaj ane, derisa edhe Anton Nikë Berisha tha se komuna ka bërë mirë që ka nderuar me këtë mirënjohje këtë personalitet, sepse përveç që është zgjedhur njeriu i duhur, me këtë nderim po dëshmohet që po nderohet edhe arti.

“Rrallë ndodh që të vlerësohet një shkrimtar dhe sot po dëshmohet kjo ku po çmohet puna e një shkrimtari, letërsisë dhe ndikimi estetik në shpirtin e njeriut që bënë letërsia”, tha Berisha. /2LONLINE/