Shkolla Bafti Haxhiu shënoi ditën e saj dhe përkujtoi 17 vjetorin e rënies së dëshmorit

/2L ONLINE/ – Me rastin e Ditës së shkollës dhe 17 vjetorit të rënies së dëshmorit “Bafti Haxhiu”, në Shtëpinë e Kulturës në Viti është mbajtur sot një tubim përmes së cilit është manifestuar për rezultatet e shkollës dhe njëherit është përkujtuar jeta dhe vepra e dëshmorit. Manifestimin e hapi drejtori i shkollës Mustafë Aliu, i cili para të pranishëmve ka paraqitur një historik të shkurtër të shkollës që udhëheq ai, duke përmendur të arriturat dhe rezultatet e nxënësve të kësaj shkolle.

Kurse fjalën e rastit e mbajti zv. kryetari i komunës së Vitisë Hasan Aliu i cili ndër të tjerash ka theksuar se nxënësit e shkollës “Bafti Haxhiu” me përkushtimin për mësimnxënie dhe me suksese e rezultate të mira, duke hapëruar drejt dijes dhe shtigjeve të diturisë, si dhe personeli i shkollës me angazhim për punë me nxënës, janë nderi dhe respekti më i madh që i bëjnë dëshmorit që po e përkujtojmë sot.

Biografinë e dëshmorit Bafti Haxhiu e lexoi nxënësja Vlera Hasani, kurse në emër të Organizatës së veteranëve të Luftës në Viti foli Abdyl Bajrami. Të pranishmit i ka përshëndetur edhe ish komandanti i UCK-së në Zonën e Pashtrikut Ruzhdi Saramata, ndërkohë që në pjesën e dytë të manifestimit është shfaqur një program artistik nga nxënësit e shkollës “Bafti Haxhiu”.

Për të nderuar dëshmorët Bafti Haxhiu dhe Sali Zenuni, në orët e paradites janë bërë homazhe dhe janë vënë kurora lulesh tek varret e këtyre dëshmorëve në varrezat e dëshmorëve në Viti, ndërkohë që lule janë vendosur edhe tek busti i dëshmorit Bafti Haxhiu në oborrin e shkollës fillore “Bafti Haxhiu”. /2L ONLINE/