Shfaqet filmi dokumentar “Vëllaçko me ty jam”

/2L ONLINE/ – Në përvjetorin e rënies së dëshmorëve Gursel e Bajram Sylejmani, në Viti është shfaqur filmi dokumentar “Vëllaçko me ty jam” të autorit Xheladin Rexhepi. Fillimisht të pranishmit kanë vu lule tek bustet e këtyre dëshmorëve pranë Shtëpisë së Kulturës, për të vazhduar më pas në sallën e Kinemasë ku edhe u shfaq filmi.

Kryetari i komunës së Vitisë Sokol Haliti, para të pranishmëve tha se në këtë përvjetor të 17-të, të rënies heroike të vëllezërve dëshmor Gursel e Bajram Sylejmani, e kujtojmë betejën e lavdishme të Jezercit, i kujtojmë dy vëllezërit të cilët qysh në moshë rinore vepruan për ti sjellë dritë dhe liri këtij vendi.

“Gurseli e Bajrami, vepruan deri në sakrificën e fundit të cilën ata e quanin ëndërr që kjo tokë, ky popull dhe ky nën qiell të frymoj lirshëm. Edhe pas këtyre 17 viteve nga rënia e tyre, nuk ndjehet asnjëherë efekti i harrimit, por ai i motivimit për ta ruajtur lirinë dhe dritën që ata i sollën vendit, motive për të punuar për Shtetin dhe për ti shërbyer popullit. Në këtë përvjetor, është më parësore, nderimi për gjithë ata që ndër breza u sakrifikuan për liri, dëshmorët e kombit, veteranët e invalidët, familjet e tyre që ishin pjesë e luftës për liri dhe fitores së përbashkët. “T’i nderojmë gjithmonë dëshmorët tanë, përkushtimin atdhetar të tyre, të cilët i bënë shërbim të madhe atdheut, duke rënë në fushën e nderit. Ajo që e bënë më madhështore veprën e vëllezërve Gursel e Bajram Sylejmani, është rënia në betejë brenda pak orësh , duke u flijuar të bashkuar në një vijë të frontit, ashtu siç jetuan dhe kishin një ideal që ta bëjnë Shqipërinë e Bashkuar”, ka thënë kryetari Haliti.

Për filmin dokumentar, i cili është realizuar nga Televizioni Tema në Ferizaj, autori Xheladin Rexhepi tha se ka qenë jo e lehtë të përmblidhet një veprimtari e tërë dhe kontributi madhor i vëllezërve Sylejmani, për lirinë e vendit. Në orët e mbrëmjes, në Galerinë e qytetit në Viti është hapur edhe një ekspozitë me piktura të dëshmorit Gursel Sylejmani, ku për rendësin e saj foli artisti prof.Fahredin Spahiu.

Kryetari i Komunës së Vitisë Sokol Haliti së bashku me kryetarin e komunës së Ferizajt Muharrem Sfarqa, në orët e paradites së sotme, kanë bërë homazhe tek varrezat e dëshmorëve në Ferizaj tek varret e dëshmorëve Gursel e Bajram Sylejmani./2L ONLINE/