Shërbime mjekësore falas në Ditën e infermierisë

(2LONLINE) – Në Ditën Ndërkombëtare të Infermierisë, Qendra Europiane për Arsim Profesional “QEAP-Heimerer” në bashkëpunim me Institutin e Evropës Juglindore për shëndetësi dhe infermieri ka organizuar këtë aktivitet duke ofruar sot shërbime falas për qytetarët e Gjilanit, për matjen e tensionit arterial. matjen e sheqerit në gjak, të peshës trupore, por ka ofruar edhe këshillimin e qytetarëve për probleme të ndryshme shëndetësore për të promovuar kështu shëndetin.

Abdullah Gruda asistent në QEAP-Heimerer i ka thënë Portalit Informativ 2Lonline se për të shënuar këtë ditë të Infermierisë, 15 studentë të QEAP-Heimerer, shumica prej tyre gjilanas po e bëjnë një aktivitet human duke ofruar shërbime falas për qytetarët gjilanas në matjen e shtypjes së gjakut, sheqerit në gjak, të peshës trupore por edhe këshilla që promovojnë shëndetin.

Sipas tij, ky aktivitet ka nisur në ora 11:00 para Teatrit të Gjilanit dhe deri në orën 13:00 janë mbi 115 qytetarë gjilanas të cilëve iu janë ofruar shërbimet në fjalë. /2LONLINE/