Shënohet Dita e shkollës “Nazmi Hoxha”
/2L ONLINE/ – Me një program artistik të organizuar nga kolektivi, nxënësit dhe kori i shkollës , në lagjen e VIII-të shënohet Dita e shkollës “Nazmi Hoxha”. Siç e dimë kjo shkollë është emërtuar në shtator të këtij viti me emrin e veprimtarit dhe atdhetarit, ish të burgosurit politik Nazmi Hoxha, andaj me rastin e ditëlindjes se tij shkolla ka vendosur qe data 5 dhjetor të shënohet si ditë e shkollës.
Në fjalën përshëndetëse drejtori i shkollës Faredin Rexhepi, foli për aktivitetet dhe sukseset e nxënësve të kësaj shkolle në garat e shumta. Ai foli edhe për jetën dhe veprimtarinë e Nazmi Hoxhës, duke theksuar se Nazmiu rridhte nga një familje patriotike, ishte i edukuar në frymën kombëtare, ishte pjesëtar i lëvizjes ilegale që punuan për çlirimin e Kosovës andaj më 1981 u dënua me 15 vite burg si udhëheqës i grupit të Anamoravës, prej të cilave me shumë se 9 vite edhe i vuajti.
Puna, përkushtimi dhe sakrifica e Nazmiut për çështjen kombëtare do të jetë themel për lirinë dhe demokracinë e vendit tonë dhe vepra e tij do të shërbejë që brezat e ardhshme të edukohen në frymën të cilën e deshi vet Nazmiu.
Të pranishmit i përshëndeti edhe vajza e Nazmiut, Festa Hoxha e cila i falënderoi të gjitha strukturat , drejtorinë dhe këshillin e shkollës, drejtorin e arsimit Nazmi Musën, kryetarin e komunës Lutfi Hazirin, Ministrinë dhe gjitha strukturat tjera që vendosën që kjo shkollë të mbajë emrin e babait të saj dhe uroi që gjeneratat e ardhshme me krenari të kujtojnë veprën dhe sakrificën që Nazmi Hoxha dha për lirinë e vendit tonë.
Veç tjerash, në këtë manifestim, nga shoqatat e dala nga Lufta e UÇK-së, iu nda certifikata dhe mirënjohje si veteran UÇK-së, për kontributin e dhënë në themelimin dhe organizimin e strukturave të luftës, mirënjohja iu nda bashkëshortes.
Të pranishmit i përshëndeti edhe shoku i idealit të Nazmiut dhe kryetar i Shoqatës të të Burgosurve Politik, Hydajet Hyseni.
Me këngë dhe valle u mbyll programi artistik, përcjellë me urimet që kjo shkollë me krenari ta mbajë emrin e veprimtarit dhe atdhetarit Nazmi Hoxha. /2L ONLINE/
