Sh.M.L “Kongresi i Manastirit” në Pozheran renditet e dyta në nivel vendi në projektin për mjedisin dhe riciklimin

“Shkolla e Mesme e Lartë “Kongresi i Manastirit” në Pozheran të Vitisë ka arritur një sukses të jashtëzakonshëm duke zënë vendin e dytë në nivel të Republikës së Kosovës në kuadër të projektit për mbrojtjen e mjedisit dhe riciklimin e materialeve, të organizuar nga Kryqi i Kuq i Kosovës në kuadër të programit PVH-PHV”, thuhet në njoftimin e komunës.

Në këtë projekt kanë marrë pjesë gjithsej 36 shkolla nga mbarë Kosova, ndërsa ky rezultat paraqet një vlerësim të lartë për angazhimin dhe përkushtimin e nxënësve dhe stafit të kësaj shkolle në promovimin e edukimit mjedisor dhe vlerave humane.

Ky sukses është arritur falë punës së përkushtuar të 30 nxënësve dhe stafit mësimor, nën udhëheqjen e diseminatorëve të projektit, Prof. Gentiana Alidema dhe Prof. Fatlum Musa, të cilët me profesionalizëm dhe angazhim kanë koordinuar realizimin e aktiviteteve.

Në njoftim thuhet se Komuna e Vitisë e vlerëson lart këtë arritje, e cila përfaqëson krenari për shkollën, komunitetin dhe komunën tonë, si dhe dëshmi të qartë të përkushtimit të të rinjve ndaj mbrojtjes së mjedisit dhe zhvillimit të përgjegjësisë qytetare.   /2LONLINE/